CM-in Chhimtuipui Darzokai lei a hawng

Tuipui-D bula Chhimtuipui lui lirthei tê tlân theihna lei (suspension bridge) dawh thar chu December 19, 2016 khan chief minister Lal Thanhawla'n a hawng.

'Jeepable suspension bridge over river Chhimtuipui at Darzokai on Hnahthial-Sa-ngau road' hawnnaah hian CM Lal Thanhawl-a chuan, Chhimtuipui kam tawn tawna awm mipuite harsatna sutkian nan leh inkalpawhna atana lei pawimawh tak hawn a ni chu lawm-awm a tih thu a sawi a, "Lei hi a neitu rilru púa dimdâwi taka enkawl turin lei hmangtu zawng zawngte ka chah che u a ni," a ti.

Lal Thanhawla chuan, lei a tlo nan, lei zawh chungchanga dan siamte chu zawm a ngai tih sawiin, "He lei, motor lianin a zawh loh nana a chunga kham a ni leh Mizoram hmun ṭhenkhata lei dawh vengtu chowkidar dah ngaite hi Kristianna zâwn aṭangin a zahthlak a, hei hian kan inen chian leh inbih chian a ṭulzia a tilang," a ti ;, Darzokaiah hian lei ṭha zawk dawh turin sorkarin ngaihtuahna a sèn thu a sawi.

Engkim maia ram leilung fate aia neitu an awm loh thu sawiin CM Hawla chuan, "A chhiat a ṭhatah kan zavai mawh a ni a, a enkawl leh a venhimte thlengin kan zavaia mawh a ni tih kan hriat a ṭul," a ti.

Chief Minister-in a hawn tâk lei hi Mizorama suspension bridge thui ber niin, meter 200-a thui a ni a, lei khaitu hruipui inbahna sang pahnih, pylon tower inkar chu meter 170 niin, pylon tower leh a hnuai lama dobelhtu 'intermediate pier' inkar chu meter 20 ve ve a ni. Lei chhuat zau zawng chu meter 2.70 a ni a, thingphel chhuat phah thuah chu inches 2-a chhah a ni.

Lei tikhawngtu atan a bán tawn tawnah 'steel built-up panel' meter 5 zela sei 33 ve ve a awm a, a thên loh nan a sir tawna thlunna (wind tie) hrui 12 a awm a, lui mawng aṭanga lei sàn zawng chu meter 12.54 a ni. A dawhna atan cheng nuai 296 sên a ni a, November 19, 2012-ah dawh ṭan niin, September 27, 2016-ah zawh a ni. Dawh a nih mek laiin December 13, 2014 chhun dar 12:15 khan a lo chim tawh a, mi pakhat thiin, mi dang pakua an hliam a ni.

Leiah hian lirthei tê chi leh maxicab leh pick-up rit phur, ton 4 (kg. 4,000) aia rit lo phur tan chauh zawh phal a ni a, motor lian an kal loh nan ft. 7'4" a sangah thîr kham a ni.