Lok Sabha MP CAB support turin kan ti - H Rammawi

Planning Board vice chairman, MNF-a Core Committee member H Rammawi chuan Lok Sabha MP C Lalrosanga chu Citizenship Amendment Bill (CAB) support tura an tih thu a sawi.

H Rammawi hian December 13, 2019 khan Mizo Hnam Runah thu sawiin, "CAB-in Mizoram a huam telve loh avangin kan lawm a, ṭha kan ti. Pu C Lalrosanga, Mizoram MP pawh kha kan Mizo hnam himna ngaihtuah vangin support turin kan ti a ni tih i hria ang u. Mizorama All NGO Co- ordination Comtt. pawhin Mizoram a huam tel lo kha a hlutzia an hriat avangin lawmthu an sawi a, chanchinbu hrang hrangah kan hmu a ni kha," a ti.

H Rammawi chuan 'Congress Rajya Sabha MP chu CAB-in Mizoram a huam telve lo kha duh loin a dodal em ni? tia zawhna siamin, Mizoram leh hnam tana thil ṭha duh loah a puh.