MPCC-in C Lalrosanga bang turin phût
Mizoram Pradesh Congress Committee (MPCC) chuan Citizenship Amendment Bill (CAB), 2019 India Parliament-a pass a nih theih nana thlawptu Lok Sabha MP C Lalrosanga chu bang turin an phut.
MPCC chuan thuchhuah siamin, CAB chungchangah MNF party leh Lok Sabha MP-te chet dan ngun taka an thlirin mipui rin a hlawh zo tawh lo nia tarlangin, "Mizoram phatsantu, MNF MP Pu C Lalrosanga hi Lok Sabha MP a nihna aṭanga bang ngei turah kan ngai a, Mizoram mipui aiawh a Parliament a ṭhu tlakah kan ngai tawh lo," an ti.
CAB chungchangah MNF leh C Lalrosanga chu inthlan laia an thutiamah an din zawh lo thu tarlangin MPCC chuan, "CAB nasa taka dodal tur nia insawia an campaign laiin BJP thangah awkin, Hindu lal ram din nan Mizoram an hralh ta," an ti a, Lok Sabha-in Parliament-ah ngei CAB thlawpna an auchhuahpui chu vanduaithlak an tih thu an sawi.
MPCC tarlan danin, MNF leh Lok Sabha MP-te chet dan chu Pathian leh kohhran pawi sawina, Mizo hnam tana thil pawi tak, Mizoram mipui phatsanna dik tak a ni. Mizoram mipuiin heti khawpa duh lohna kan lantir laia MNF party-in, 'Mizoram MP Pu C Lalrosanga'n CAB a support ta hi a tih tur tak a tiah MNF chuan a ngai a ni' ti a thuchhuah an siam ngam phei chu mipui zah lohna vawrtawp a ni.
Mizo ṭhalai rual, CAB an duh loh zia thianghlim taka lan tirtute an mankhawm duh dante enin Hindu kal fawr pawl RSS kalphung an zui chho zel niah an ngaih thu tarlangin MPCC chuan, "Hindu nationalist party BJP hian Hindu lal ram din hi an tum nghet hle a, CAB an hlawhtlinpui tawh bakah nasa taka an aupui mek Uniform Civil Code (UCC) hi kum 2020 aṭangin kalpui an tum a ni," an ti.
MPCC chuan UCC chu India rama hnam leh sakhaw hrang hrangte tih dan leh kalphung, Hindu kalphung mila khaikhawm tumna, kalphung pakhata in kal tir tumna a nih thu sawiin, "Hei hian Mizo Kristian inneih dan leh ro khawm dan zawng zawng ala sut chhiat theih dawn bakah sakhaw dang nen huang khata khung kan ni dawn," a ti a, UCC chuan Kristian-te kalphung nasa takin a sawi nghin dawn thu a sawi.
MPCC chuan Lok Sabha MP C Lalrosanga chu an zah hle thu tarlangin, "Amaherawhchu a behchhan party, BJP thlawptu MNF party kalphung a fuh loh miau avangin Hindu lal ram dinna atana Mizoram hralhtu, mipui bumtu, kohhran leh Kristiante thlavang hauh ngam lotu ti a mualpho taka mipui thinrimin an nawr thlak hma ngei a, ama zahawmna humhim turin MP aṭanga bang ngei turin kan phut a ni," an ti.