Youth Commission tirh zirlai 32-te Kum 2 hnuah beidawngin an lo haw

Mizoram Youth Commission (MYC) bultuma Nalanda Institute of Advanced Studies, Kolkata-a Bachelor of Hotel Manage-ment zir tura tirh chhuah Mizo zirlai 32-te chu harsatna hrang hrang vangin an zirlai zir zo thei loin an lo haw. Zirlai 32-te zirna senso atan hian Mizoram sorkarin NIAS-ah cheng nuai 128.20 a pe lâwk tawh a ni.

September 2016-a neih zawh tak Assembly session-ah khan, Finance minister Lalsawta pharh Report of The Comptroller and Auditor General of India-a tarlan danin, Mizoram Building and Other Construction Wokers' Welfare Board (MBOCWWB) chuan wokers' welfare cess a hmuh cheng nuai 514 chu dan dik loa hman a ni.

Cheng nuai 514 hman dik loh zinga nuai 128.20 chu Mizoram Youth Commission (MYC) bultuma Nalanda Institute of Advanced Studies (NIAS), Kolkata-a Bachelor of Hotel Management (BHM) zir tur mi 32 senso atan hman a ni.

BHM hi kum thum zir tur a ni a, September 3, 2014 khan zir tura thlante chu New Secretariat Complex kawng pengṭhuam zau lai aṭangin, Labour, Employment & Industrial Training director Rotluanga'n a vai liam.

MoU ziah dan chuan, NIAS-a zir tur hian zirlai pakhat tan Rs. 4,00,600 zel sen a ngai a; BHM hi August 2017 thlaa zir zawh tur a nih laiin, MYC-in zirlaite a tirh liam
aṭanga thla hnih hnu lekah an zirna tur senso chu pek nghal vek a ni. RTI Act hmanga zawhna chhannaa a lan danin, August 5, 2014 khan first instalment pek a ni a, kum 2014 vek September 15 leh 16-ah khan second instalment leh third instalment pek a ni bawk.

CAG Report tarlan dan chuan, MBOCWWB-in sum a pek chhuah theihnate chu - kut hnathawktu, Board-a inziak lutte an chetsuala ṭanpuina pek te, kum 65 an tlin huna pension pek te, kut hnathawktu emaw, anmahni rinchhante an damloha an inenkawlna tumsak te, kut hnathawktu fate zirna atana ṭanpuite leh thil dangte a ni. Hetih lai hian, BHM zir tur hian sum pek chhuah theih dinhmuna ding lem lo thlan an awm nual.

RTI Act zawhna chhannaa a lan danin, zirlai tirh an nih hma hian Mizoram sorkar hian NIAS chu a zir chiang hmasa lo. NIAS hi Tamil Nadu state chhunga private university, Annamalai University hnuaia distance education centre pakhat a ni tih Mizoram sorkarin a hre lâwk lo a; zir chiang hmasa loin zir man cheng nuai 128.20 chu thla hnih chhunga pek tlak turin thu a thlunpui a ni.

Vanglaini palai zawhna chhangin NIAS-a zir, rawn haw tawh zirlai pakhat chuan, "A hmun kan zuk thlenin ràlkhata an insawi ang an ni lo. Hostel-ah lehkha zirna tur dawhkân a awm lo a, chaw ei pindan pawh a awm lo. Sorkarin a tum tura ngaih exam fee pawh kan chawi zel a, damlohin mahni sensoin kan inenkawl. Mizoram sorkar hnenah, Chief Minister leh concerned minister hnenah harsatna hrang hrang kan tawh dan ziakin kan thlen tawh a, tun thlengin engmah min tihsak kan hre lo," a ti.

Zirlai zinga hruaitu chuan, "NIAS-a zirlai tirh chhuah 32 zinga pali chu first year pawh an exam hmain drop out (hnâwl) an ni a, a kum hnihnaah zirlai 25 chauh awm tawhin, heng zirlaite pawh hi an chanvo tur ang an chan loh vang leh harsatna hrang hrang vangin degree hlawh chhuak tura zir chhunzawm zelna chi niin kan hre lo a. Sorkara zualko a sâwt bawk si lo a, zir chhunzawm an awm tawh lo," tiin a sawi.

Zirlai tirh chhuah an nih dawnah tablet an dawn nghal tur thu sawi a ni a, zirlaibu leh uniform pawh hmu tura tih an ni a; mahse, chungte chu April 2016 thla thleng kha chuan zirlaite hian an la dawng lo a, exercise bu leh practical bute chu anmahni'n an inlei chawp a ni.

MoU-a 2.5 leh 2.6-a an ziah dan chuan, zirlai damlo an awm a nih chuan NIAS-in a enkawlna senso a ngaihtuahsak tura tih a ni. Chutih laiin, zirlai damlo, damdawi-ina admit ngaite pawh an awm a, NIAS-in senso an tumsak lo a, zirlaite'n an intum zel a ni.