Lottery sumah Chief Minister-in Share a neih ve MNF-in an ring

MNF MLA Dr K Beichhua chuan nimin khan Mizo Hnam Rûnah thuthar thehdarhtute a kâwm a; Mizoram sorkarin lottery a kalpuinaah chief minister Lal Thanhawla'n chan (share) a neih ve ngei MNF-in an rin thu a sawi.

Mizoram sorkarin Lotteries (Regu-lation) Rules, 2010 a tih-chhuah hnu March 9, 2011-ah tender a chhuah a nih thu sawiin Dr K Beichhua chuan, "Firm 13 chhànna a nung a, paper lottery-ah Lotwin Online Lottery-in chhang sáng berin Rs. 57,000-in a chhang. Online lottery-ah Summit Online Lottery-in chhang sáng berin Rs. 60,300-in a chháng thung. Bumper lottery chu draw khat zelah Rs. 5,00,000 aia tlem loa chhan tur a nih angin AK Agency-in Rs. 10,00,000-in an chháng a ni," a ti.

Dr K Beichhua sawi danin, tender hi chhuanlam hotê hmangin withdraw leh thut a ni a, December 20, 2011-a tender a chhuah leh chu tuna duhsakna dawngtu firm palite'n chhan theihna hniam ber - online leh paper draw khat zelah Rs. 10,000 leh bumber-ah Rs 5,00,000-in an chhang a ni. Hei vang hian sorkar sum hloh tur chu pakla hisápin kum tin vbc. 60 chuang a ni tih MNF President-in March 6, 2012-a a press conference-ah a lo sawi tawh a, sum hloh zat chu CAG Audit Report-ah chuan vbc. 60 mai ni loin, vbc. sang chuang a ni.

Mizoram sorkar chuan CM Lal Thanhawla duhsak firm palite nen lottery-ah kum hnih atan agreement an siam a, (Regulation) Rules, 2010 chhuah hnua agreement siam siin, Rule 3(17) leh 2(h) kalhin inremna siampui a ni. Chuvang chuan, kum 2012-13 aṭanga 2014-15 chhunga lottery hralhna sum cheng vbc. 11,834.22 Mizoram sum báwma lut tur a lut ta lo tih CAG report-in a tarlan chu thil dik tak a ni a; kum 2015-16 chhunga sum chàn nen chuan vbc. 20,000 dáwn a ni.

Firm pali leh Mizoram sorkar inremna hun tawp May 2014 hnuah kum khat atan (29.5.2014-28.5.2015) agreement pawhsei a ni a; chumi hnuah tender thar chhuah lo bawkin kum thum atan (29.5.2015-28.5.2018) agreement siam a ni leh bawk.

Dr K Beichhua chuan, lottery-ah hian Mizoram sorkar a hek tual tual a, agent-te an hlâwk tulh tulh thung tih sawiin, "A hlâwkna hi Pu Hawla hian tam tham tak a chang ve ang tih hi kan ring tlat a, engzat chiah nge a chan Zoram mipuite hmaah puang turin kan phût a ni," a ti. MNF chuan sorkar sum hlohna tihtawp thuai a nih theih nan firm palite term pawhsei leh mek chu a rang thei ang bera titawp leh CAG rawtna anga a thara lottery kalpui thuai turin sorkar an phût tih a sawi.

Lottery buaina inṭan laia Finance minister chu CM Lal Thanhawla a nih thu sawiin Dr K Beichhua chuan, "A hnuah Pu Liansailova'n thlakin agreement hmasa ber hi ani hun laia siam a ni. Mahse, lottery hi chuan Finance Minister dawhkân kal pelin CM dawhkân a thleng zel. Lottery Committee-in single bidder a pawm theih loh pawm luitu pawh Finance Minister ni loin, Chief Minister a ni a, Pu Hawla hi Lottery Minister nihna pek hial a phû hlein kan hria," a ti.

Dr K Beichhua chuan, lottery-a buaina inṭanna chu Lalsawta'n Finance a chan hma nia sawiin, "A pute leh tuna lottery agent-te hnung thak inhiah tawn dan hi a hre chiang lo deuh a nih pawhin a thiamawm hle. Chutih laiin, lal ṭhutthlenga han ṭhut meuh chuan Zoram khawvar hun nghaktute zinga mi pawh thil tidik lotu kaihbûa a ṭang duh leh ta mai hi a mak kan ti hle," a ti. CAG report chu sap ṭawng thiam tan chuan hriat sual palh a awm thei lo tih Finance Minister-in hria se a duh thu a sawi bawk.