KHAWTHLIR

Lokayukta

Law & Judicial department aṭanga thu dawn danin, Mizoram sorkarin Lokayukta a din turah officer leh staff 35 lak tum a ni. Thawktu lak tur zat hi DPAR leh Finance department-in an pawm tawh a, November 18, 2016 khan Cabinet-a ngaihtuah tura thehluh a ni tawh. Law & Judicial department chuan Lokayukta-a chairperson leh member atana rawt duh neite tan January 31, 2017 thleng rawtna thehluh theih hun a hawng mek a ni.

MLA-in enfiah

Aizawl East-II bialtu MLA Lalsawta, Finance minister chuan nimin khan a bial chhung, Armed Veng South aṭanga Bethlehem Vengthlang inkar inkalpawhna siam mek a tlawh a, hna thawh dan a enfiah. Kawng hi UDPA department hnuaia thawh niin, metre 800-a thui a ni.

Kût thlirlet

Ṭhalfavang Kût Organising Committee chu nimin khan an chairman John Rotluangliana, Tourism minister hoin Tourist Lodge, Chaltlangah an ṭhukhawm a, December 15-17, 2016 chhunga Tuirial Airfield-a Ṭhalfavang Kût hman zawh tak an thlir let. John Rotluangliana chuan, harsatna lian tham awm loa Ṭhalfavang Kût hman a ni chu lawmawm a tih thu a sawi.

Golden Year

Bethlehem Vengthlang chuan kumin hi an veng tan kum ṭha leh chhin­chhiahtlak, Golden Year-ah an puang a, zanin hian an veng kâwnah an lawm dawn. Bethlehem Vengthlang hi kumin hian NECS Cup, U-13 Football leh MPL U-18 Football leh Inter Branch YMA Quiz-ah an champion a, MPL Season 5-ah pahnihna an ni bawk.

Hall hawng

Rs. 41,37,716 senga sak, Upper Khatlaa Bible House-a BSI Hall chu Thawhlehni khan Bible Society of India Aizawl Auxiliary president Rev. Dr H Vanlalauva'n Pathian hnenah hlanin a hawng.