Tuialhthei thawn chhuah titawp turin CYMA-in YMA group pali a ngen

Central YMA chuan thu-chhuah siamin, Mizorama petrol pump-te'n tuialhthei an lak luh tawh, black-a zawrh tura Manipur-a thawn chhuah tihtawp a nih theih nan a ṭul anga mahni huam chhung ṭheuha ngawrh zawka hma la turin YMA group pali - Tuiphal group, Khawzawl group, Saitual Group leh Zawlbuk group-te beisei an nih thu a tarang.

CYMA thuchhuah chuan, nimina CYMA office bearer meeting-ah tun hnaia Mizorama petrol/diesel váng ta lutuk chungchang an ngaihtuah tih tarlangin, "Mizoram petrol/diesel-te black-a Manipur lama thawn chhuah a tam thu hriat a ni. Mizo mipuite'n oil-ah harsatna kan neih loh nan CYMA chuan black-a zawrh tur Mizoram petrol/diesel Manipur-a thawn chhuah hi tihtawp a nih theih nan hma a la a ni," a ti.

CYMA chuan, tuialh-theia harsatna chu Mizoram sorkar pawhin a ṭul anga hma a lak an beisei thu sawiin, "Hetih mek lai hian, Manipur-a Zo hnahthlak unaute'n harsatna an neihte chu Manipur group YMA kaltlangin CYMA chuan a ṭul angin hmalak a tum," an ti a; tuialhthei leh leh ei leh barah Manipur sorkar-in mamawh a nei a nih chuan Mizoram sorkar pawh mumal takin a be tura an ngaih thu an tarlang bawk.

Tuiphal group leh Ngopa Join YMA duty-te chuan Thawhlehni khan Ngopa dáiah Mizoram aṭanga Manipur-a phurh luh tur petrol leh diesel litre 10,680 leh a phurhna lirthei pahnih an hrêng.

Tuiphal group YMA president K Lian-hming-thanga sawi dan-in, Aizawla pump ṭhen--khatin Manipur-a hralh tur petrol leh diesel thawn chhuah chung--
-changah CYMA Kum-puan Com-mittee-te'n hma la tura an ngen ang-in, chawhma dar 10 vel aṭangin Ngopa dáiah an duty a; 1109 truck leh 407 truck hmanga phurh petrol leh deisel litre 10,680 chu an hréng a ni. An duty hmain Lalbawi Filling Station aṭanga hralh chhuah phurtu truck pakhat chu a tlan tlang hman niin a sawi.

1109 truck chuan litre 7,000 vel a phur a, truck khalhtute chuan petrol leh diesel-te chu Lalthanzauva Filling Station aṭanga an lei a nih thu an sawi. 407 truck zawk chuan litre 3,680 vel a phur thung a, Hauva Filling Station aṭanga an lei a ni.