Good Governance Day atana puan Kristiante palzûtnaah MKHC-in a ngai

Mizoram Kohhran Hruaitute tee (MKHC) chuan thuchhuah siamin, India sorkarin Kristiante ni pawimawh ber zinga mi, Krismas ni taka Good Governance Day a hmang chu Kristiante palzûtnaa an ngaih thu an tarlang.

MKHC thuchhuah chuan, "Government of India-in Good Governance Day, December 25, Krismas ni-a hmang tura a ruat hi Kristiante kûtpui leh ni serh tihbawrhbânna a nih avangin MKHC chuan pawi a tiin vanduaithlak a ti a. He hun hi Kristian tinte chuan Lal Isua piang lawmin hlim takin hmang se kan duh a ni," a ti.

December 25 chu prime minister hlui AB Vajpayee pian ní a nih vanga Good Governance Day atana ruat a nih thu sawiin MKHC chuan, "He ni hi hmásáng
aṭanga Kristiante kûtpui leh ni serh niin, India sorkar ngei pawhin national holiday atana a hman reng a ni," an ti a; Krismas ni-ah Good Governance Day hmang loin, ni dang remchang ruat zawk tur leh Krismas lawmna tibuai thei tur zawnga sorkar function siam lo turin thuneitute an ngen.

MKHC chuan, "Hun lo kal leh zel turah pawh Good Governance Day hi Krismas tibawrhbáng lo tur leh Kristiante thinlung tina lo tura ruahmanna siam turin MKHC chuan Prime Minister hnenah memorandum thehlutin hma a la a ni," an ti bawk.

MKHC hian Mizoram mipui zawng zawngte Krismas hlim taka hmang turin duhsakna an hlan a ni.