State Planning Board an ṭhukhawm

Mizoram State Planning Board chu nimin khan Planning conference hall-ah chief minister Lal Thanhawla hoin an ṭhukhawm a, thil pawimawh hrang hrang an ngaihtuah.

Chief Minister chuan, sorkar laipuiin Planning Commission a ṭhiah hnuah budget-a awm
ṭhin plan leh non-plan head-te tihtawp a nih thu sawiin, "State zawng zawngte chu budget thar 2017-2018 ah hengte hi chhûnfin a, budget thar kalpui turin thurâwn min rawn pe tawh. Chutiang záwng chuan budget thar lo awm tur hi kalpui a ngai dawn a, hei hi sorkar fawng vuantu leh sorkar hnathawkte'n kan chian a ṭul," a ti.

Meeting-ah hian Finance commissioner L Tochhong leh Planning secretary Dr C Vanlalramsanga ten budget duanna kawnga kalphung thar sorkar laipuiin a ruahman, plan leh non-plan expenditure chhûnfin a, budget duan dan tur an sawifiah.

Sorkar laipuiin state-te sum a pek dan a thlak chu ruahmanna ṭhaah meeting chuan an ngai a; hmasawnna hnate chu ‘goal oriented’ leh tunlai khawvel buaipui mek ‘sustainable development goal’ hawi zawnga ruahmannate kalpui pawimawh an ti.

Meeting-a tarlan danin, sor-kar laipuiin Planning Commission a ṭhiah hnuin Niti Aayog a din a, plan leh non-plan sumte'n awmzia a neih tawh loh avangin plan leh non-plan-te chu chhûnfinin, kum 2017-18 aṭangin budget thar kalpui a ni dawn. Expenditure head awm ṭhin revenue expenditure leh capital expenditure-te chu awm chhunzawm tura ruahman a ni. Central chuan capital expenditure ngai pawimawh turin state-te thurâwn a pe a, budget siam rualin kum thum lo awm tura an sum mamawhte tarlangin, medium term expenditure framework duang turin a ti bawk.

Meeting-ah hian Finance minister Lalsawta, Planning Board vice chairman H Liansailova, chief secretary Lalmalsawmte pawh an tel a ni.