Hmarchhakah infiamna ruhrel Nei ṭha pawl kan ni - CM Hawla

Chief minister Lal Thanhawla chuan, ṭhalaite khawvel thar siamna atan zirna leh infiamna chu hmanraw pawimawh a nih thu sawiin, hmar-chhak state-te zingah Mizoram chu infiamna ruhrel leh hmunhma nei ṭha ber pawl a nih thu a sawi.

Thawhlehnia Thenzawl Zone Football Association buatsaih MLA Trophy Football Running Trophy 2016 khârna a hmanpuinaah thu sawiin Chief Minister chuan, "Ṭhalaite tan khawvel thar buatsaih chu sorkar ngaih pawimawh berte zinga a mi a ni a, zirna leh infiamnate hi hemi atan hmanraw pawimawh an ni," a ti.

Lal Thanhawla chuan, MFA hma-lakna leh hnathawh avangin ṭhalai tam tak Mizoram páwn club-ahte khelin eizawnna nan an hmang mek tih sawiin, "Hei hi thil chhuanawm leh lawmawm tak a ni," a ti a; MFA hmalakna vangin Mizoram chu football factory tih theih khawpin footber-te'n an chawi lâr thu a sawi.