KHAWTHLIR

December 14 khan Dawrpui Bial KṬP-in Dawrpui Kohhran Hall-ah blood donation camp an huaihawt a, an bial chhunga KṬP member mipa 36 leh hmeichhia pakuate'n Synod Hospital tan thisen unit 45 an pe. Serchhip Kawnpui Branch KṬP-ten an kohhran hall-ah Serchhip District Hospital tan thisen unit 32 pein, a petute mipa 24 leh hmeichhia pariat an ni. ṬKP Ṭawipui South Bial pawhin Lunglei Civil Hospital tan thisen unit 20 an pe a, petute mipa 19 leh hmeichhia pakhat an ni. MTP Zyhno Branch pawhin December 13 khan an khaw kum 100 tlin pualin Saiha District Hospital tan mipa 34 leh hmeichhia pasarihte'n thisen unit 41 an pe bawk.

Aizawl South-II bialtu MLA Lalchhuanthanga chuan a fund hmanga a lei morgue van chu December 14 zan khan Tuikhuahtlang Branch YMA hnenah a hlan. Tuikhuahtlang hian Hlimenah thlanmual an neih avangin YMA-te harsatna hriatpuiin Bialtu MLA hian morgue van hi a lei a ni.

UPC-North East India, Bawngkawn kohhrante chuan December 14, Inrinni khan an biak-in thar hawnna hun leh an kum 40 (ruby jubilee) tlin an lawm. Biakin thar hi Aizawl East District UPC superintendent Rev Rosanga Kawlni-in a hawng a, Pathian hnenah a hlan nghal. 

Citizenship Amendment Bill, 2019 (CAB) duh lo Mizo ṭhalai rual, social media hmanga inhûi khawm, 'Zoram Revolution Movement' (ZRM)-te chuan vawiinah Vanapa Hall kawtah CAB duh lohna lantirin, sit-in demonstration an huaihawt leh dawn.