Mizoram sorkarin MGNREGS-ah Ni 21 inhlawhna sum a hmuh belh

Sorkar laipui chuan Mizoram MGNREGS (ni 100 inhlawhna) atan cheng nuai 8,867 a sanction a, hei hi Mizoram pumpui a job card nei chhungkaw 1,97,127 te tan ni 21 inhlawhna a daih a ni. 

Sorkar thuchhuah tarlan danin, Rural Development minister Lalruatkima'n December 6, 2019 a Delhi-a Ministry of Rural Development secretary Amarjeet Sinha a hmuh khan sorkarin mipui inhlawhna hlawh ala pek loh ba cheng nuai 7700 vel mamawh a nih thu a thlen a ni. 

Amarjeet Sinha hian Krismas hma ngeia MGNREGS sum la bat te pek a nih tur thu a lo hrilh. August 2019 aṭang khan MGNREGS hnuaia inhlawhna pawisa hi sorkar laipuiin a pek hleih theih loh avangin Job Card holders leh khaw tam tak a Village Council-te an mangang hman hle. Heng sum sanction-te hi mipui bank account-ah direct-a lut tur a ni. December 2, 2019 khan sorkar laipui chuan MGNREGS sum cheng nuai 5382 chu Mizoram tan sanction alo ni tawh.

Cheng nuai 8,867 sanction thar nen hian kumin 2019-20 chhung a mipui inhlawhna tur atana MGNREGS hnuaia sorkar laipuiin a sanction tawh zawng zawng chu cheng nuai 43,118 a ni. Tunah hian MGNREGS hnuaiah mi pakhat in nikhatah Rs. 211/- an hlawh mek. 

Rural Development Minister chuan Mizo mipuite hunpui Krismas lo awm tura inpuahchahna kal mek lai leh sum mamawhna san lai taka mipui inhlawhna sorkar laipuiin a rawn sanction chu lawmawm a tih thu a sawi.