Sanitation Club-in kum 3 tlin lawm

December 14, Inrinni khan Mamit Bazar Venga Children Sanitation Club (CSC) chuan an kum thum (leather jubilee) tlin  an lawm a, District Urban Development Officer (DUDO) C Sawihlira'n a hmanpui. 

Sawihlira chuan UD&PA hnuaia Mamit Bazar veng faina kawnga hmala tura din Bazar Veng Children Sanitation Club in kum thum a tling ta chu lawmawm a tih thu a sawi a, an hmalakna chuan rahṭha a chhuah thute midangte zirtirtu an nihnate chu fakawm a tih thu leh naupang nu leh pate chungah lawmthu a sawi. 

DUDO hian Mamit khawpui chhunga Venghlun leh Dinthar Vengte tan Children Sanitation Club a hawng thar nghal a ni. Inkhawm hi Mamit Bazar Veng CSC president Laltharzeli'n kaihruaiin, Chhimveng YMA President, Bazar Veng VCP leh Hmarveng VC aṭanga Sanitation Chairman leh Venghlun YMA President-te pawhin thu an sawi.