December 24 zan dar 10 thleng Millennium Center hawng dawn

Mizorama sumdawnna in lian, Millennium Centre chu Krismas vuakveta mipui dâwr theih turin December 24 thleng hawn a ni dawn a, December 5-24 chhung chu zan dar 10 thleng hawn a ni ang.

Millennium Centre (MC) Manager chuan, MC building chhung hmun hrang hrangah CCTV vuah a nih tawh avangin rûkrûte chetna leh thil bo a tlem phah tih a sawi a, "Building chhunga dawr hrang hrangah thil bo awm ve zeuh ṭhin mahse a tam lem lo. CCTV a awm tih an hriat avangte pawh a ni ang, rûkru chetna sawi tham tak tak a awm tawh lo," a ti. Chutih rualin, MC compound páwn, maxi­cab stand velah thil bo leh mi bum ching an tam thu a sawi.

MC chhungah meizûk khauh taka khap a nih thu sawiin Manager chuan, "Building páwna zûk erawh kan khawih phak a ni lo a, mahse, building chhungah chuan kan khap bur avangin an zâwm ṭha viau a, man tur an awm meuh lo," a ti a; compound chhung, hulhliap nei lo china mei zu an mante chu pawisa an chawitir lo a, security duty-te'n ṭha takin zu lo tura an hriattir mai ṭhin thu a sawi a ni. 

MC Manager chuan, Krismas vuakvêt chhung atan MC kawt záwl leh a chung záwl chu ni khatah Rs. 3,000-a luah turin December 31 thleng allotment an pek thu a sawi a; a chhunga lift leh lift inkar âwl (atrium) erawh chu luah man ni khatah Rs. 4,500 a ni a, mahse, December 16 thleng bak inzawrh nan hman remtih a nih loh thu a sawi bawk.