Lunglei Ni hlim taka lawm a ni

Nimin kha 'Lunglei Ni' a ni a; Lunglei Municipal Council (LMC) huaihawtin C Ṭhuamluaia Mualah a ṭum khat nan hman niin, LMC chairman Lalzuithanga khuallian a ni. Lunglei Ni hi March 4, 1889-a Col. Tregear-a'n Fort Lungleh a sak ṭan ni hriat reng nan leh Lunglei khawpuia chengte'n Lunglei hmangaihna thinlung an put thar zel theihna tura buatsaih a ni.

Lunglei Ni lawmnaah hian Lunglei Ni puala intihsiakna hrang hrang lawmman sem a ni a; LMC huam chhunga YMA branch hrang hrang telna Zaipawlpui, Mizo Cultural Artistes' Association, Higher and Technical Institute Mizoram (HATIM), Lunglei College, J Buana College, YMA Rahsi Veng Branch leh Chanmari Branch ten hnam lam leh zaite an entir.

Tualchhung kutchhuak thuam leh hmanrua leh ei tur hrang hrang zawrhna stall hawn niin, naupang intihhlimna buatsaih a ni a; Lunglei Photographers' Association buatsaih Photo Gallery-ah thlalak hrang hrang pho chhuah a ni bawk.

LMC Chairman chuan, Lunglei Ni chu Lunglei mipuite'n Lunglei tana an tih theih sang ber hmu chhuak tura thawhrim bul ṭanna ní atan te, mahni thawh chhuah hmanga intodelh dan tur ngaihtuahna ni atante hmang turin kal khawmte a chah a, "Lunglei hi municipal council nei, khawpui lian a nih tawh avangin sorkara innghat pumhlûm ngawt loa mahni thawhrimna hmanga khawpui enkawl a, hmasawnpui tura mawhphurhna pek a ni," a ti.

Lalzuithanga chuan, hmasawn tura mawhphurhna hlen tumin LMC-in theihtawp a chhuah tih sawiin, C Ṭhuamluaia Mual bul chu multi-level car parking atan ruahman a nih thu leh tender chhuahin thawktu tur tihfel a nih tawh thu a sawi a, "Theiriat ram TNT chhakah truck 70-80 vel din theihna tur cheng nuai 250 vel sengin transport hub sak a ni dawn a, Sazaikawnah LMC Complex cheng nuai 400 vel senga sak tur leh Ramthar Market-te pawh tender chhuak mai tawh tura beisei a ni," a ti a; Saikuti Hall pawh cheng nuai 500 senga chei ṭhat tur a nih thu a sawi.

Kuminah Lunglei khawpui tan project a tam thei ang ber buaipui tum a nih thu sawiin LMC Chairman chuan, "16th Finance Commission recommendation angin mahni puala sum dawn ve tawh kan inbeisei a, 3rd State Finance Commission, SASCI, UIDF leh Central Funding hrang hrang hmangin hna kan ṭan tak tak theih tawh kan beisei bawk," a ti.

LMC Chairman hian Lunglei ṭhalaite chu ruihhlo leh nawmchennaa inhmang ral mai hman an ni lo tih hre tur leh, zirna, eizawnna leh hmasawnna kawng hrang hrangah ṭan la turin a chah a ni.