CYMA-in dan siamṭhat hnam dang pasala neih ṭhat lohzia lannaah ngai

Central YMA chuan, tun hnaia Assembly House-a pawm tâk, ‘The Mizo Marriage and Inheritance of Property (Amendment) Act, 2026’ chu hnam dang pasala neih a ṭhat lohzia leh a pawizia tarlanna ṭha taka an ngaih thu an tarlang.

YMA Central Executive Committee chuan The Mizo Marriage Divorce and Inheritance of Property Act, 2014 siamṭhatna, The Mizo Marriage and Inheritance of Property (Amendment) Act, 2026, tun hnaia Mizoram Legislative Assembly-in a pâwm tak chungchang March 2, 2026 khan an sawiho a; thuchhuah an siam nghal a ni.

Central YMA chuan, "He dan (The Mizo Marriage and Inheritance of Property (Amendment) Act, 2026) hian Mizo hmeichhia hnam dang pasala neite a huam loh avangin hnam dang pasala neih a ṭhat lohzia leh pawizia tarlanna ṭha tak ni-ah kan ngai," an ti.

CYMA chuan, nikuma YMA Inkhawmpui Lianah 'Mizo hmeichhiate'n hnam dang pasala an neih zel loh nan CYMA hian inzirtirna nasa zawkin kalpui rawh se,’ tia a rêl thu leh, hnam humhalhna leh himna tura Mizoram Legislative Assembly-in Bill a pawm chu lawmawm an tih thu an tarlang a ni.