Excise & Narcotics-a thawktu lak thar training zote thlahna hun hman a ni

Central Training Institute, Sesawnga Excise & Narcotics basic training batch 11-na pualin nimin khan Passing Out Parade buatsaih a ni a, Excise & Narcotics minister Lalnghinglova Hmar khuallian niin, adviser to chief minister Lalmuanpuia Punte, MLA khualzahawm a ni.

Lalnghinglova Hmar chuan, Excise & Narcotics department (END) chu Chief Minister thlawpna avangin department hmasawn ber zinga mi a nih thu a sawi a; END-ah thawktu indaih lohna a nasat ṭhin thu sawiin, "Tun kum hnih kal ta chhungin direct recruitment-in thawktu 28 lak a nih tawh a, mi 41 lak belh lehna tur pawh buaipui mek a ni a, post thar 16 siam a ni tawh," a ti.

District thar pathum - Saitual, Khawzawl leh Hnahthialahte Excise station hawn thar a nih thu sawiin Lalnghinglova chuan, "Inspector awpna hnuaia awm ṭhin kha Lawngtlai nen assistant commissioner awpna hnuaia an awm tawh dawn," a ti a; rêl chawlhhmun awmna Sairang leh Bairabi-ah Excise station thar hawn phalna pawh an hmuh tawh thu leh END-in tun hnaiah lirthei thar 21 an dawn thu a sawi.

Excise Minister chuan, training zo tharte chu theihtawp chhuah tura chahin, "Indo kan ni a, kan do lamah kan ṭan a thiang lo," a ti a, ruihhloa inhnamhnawih lo turin a chah.

Lalmuanpuia Punte pawhin thu sawiin, END-a thawktu lak tharte chu party induhsakna tel loa dik taka lak an nih thu a sawi a, "Dan ang taka lak in nih angin dan ang taka thawk turin kan phût lêt dawn cheu a ni," a ti.

Training zo thlahte hi sub-inspector 12 leh constable 10 an ni a, September 1, 2025-an ṭraining an ṭan. Thlahna inkhawmah hian END commissioner Z Lalhmangaiha leh department official-te an tel. CTI commandant Lalrengpuia'n training chhuakte chu rinawmna thu a tiamtir a, training chhunga ti ṭhate hnenah lawmman sem a ni bawk.