KHAWTHLIR

KṬP-in thisen pe

KṬP, Khatla North Branch chuan nimin khan an kohhran hall-ah thisen pek rûnpui an huaihawt a, Synod Hospital tan thisen unit 32 an pe a, petute mipa 26 leh hmeichhia paruk an ni.

Confidential vangin pe thei lo

Planning & Programme Implementation department enkawltu chief minister Lalduhoma chuan Assembly session-ah MNF member Ramthanmawia zawhna ziaka chhangin, ZPM ministry hnuaia minister hrang hrangte tana road map siam chu confidential document a nih avangin pek chhuah a rem lo tih a tarlang.

Zemabawk West LC inthlan hun

State Election Commission chuan March 25, 2026-ah Zemabawk West Local Council inthlan buatsaih a nih tur thu March 3, Thawhlehni khan a puang. SEC tarlan danin, inthlana chuh turte tan March 9, 2026 thleng hming pek luh theih a ni a, March 25 zing dar 7 aṭanga tlai dar 5 inkarah vote thlak hun hawn a ni ang. Zemabawk West LC-ah hian seat panga a awm a, voter 987 awmin, mipa 492 leh hmeichhia 495 an ni.

Damlo bill pe

Mizoram sorkar chuan Mizoram Universal Healthcare Scheme (MUHCS) kalpuitu damdawi-in hrang hrang hnenah March 3, Thawhlehni khan damlo enkawlna senso cheng vbc 8.19 a pe chhuak. Heti hian, April 1, 2025 aṭanga March 3, 2026 thlengin sorkar chuan MUHCS kalpuitu damdawi-inte hnenah damlo 1,02,188 enkawlna senso cheng vbc 156.35 a pe chhuak tawh a ni.

PYD Day hmang

Mizoram UPC ṭhalai pawl, Pentecostal Youth Department (PYD) chuan nimin khan an din champha vawi 32-na an lawm. PYD Day pual hian hmun hrang hrangah an remchan angin hun an hmang a; vantlang hmun tihfai, hnatlang leh inkhawm tein hun an hmang a ni.

State Day of Prayer thlir let

State Day of Prayer of Committee chuan nimin khan February 20, 2026-a State Day of Prayer hman zawh tak chu Aijal Club-ah an thlir let. Kum dangah chuan district headquarters lamah a tam thei ang ber headquarters hruaitute'n hmanpui theih ni se, an ti.

AR-in heroin man

Assam Rifles sipaite chuan March 2, 2026 khan Zokhawthar leiah heroin gram 26 an man a, a neitua puh TJ Jonathana, Myanmar lam mi an man nghal bawk. Heroin leh a neitua puh hi Zokhawthar police-te hnenah an hlan a ni.

Wildlife Day hmang

Aizawl South-III bialtu MLA Baryl Vanneihsangi leh ASEP chuan nimin khan Melriatah World Wildlife Day an hmang a, Aizawl South-III huam chhunga Environment Awareness Campaign an hawng nghal. Inkhawmah hian MLA Baryl Vanneihsangi'n Photo Competition a buatsaiha lawmman sem a ni.