Pisa pangaah e-office kalpui tawh

Department of Personnel and Adminis-trative Reforms minister K Sapdanga chuan March 3, Thawhlehni khan Assembly session-ah ZPM member VL Zaithanzama zawhna chhangin, pisa pangaah e-office kalpui a nih tawh thu House a hrilh a, "Pisa 15-ah kalpui leh tura hmalak tum a ni," a ti.

DPAR Minister chuan, e-office hmannaah chuan paper hmang loin file leh document-te kaltir a nih avangin paper manah insên tam a ngaih loh bakah, a felfai a, file chhui zui a awlsam thu sawiin, "Document-te awlsam taka zawn chhuah mai a awlsam," a ti a, kângmei leh chhiatna dang lakah pawh a him thu a sawi.

e-office-ah file kal dante a lang chiang a, langtlang sorkar siam nan a ṭangkai thu sawiin K Sapdanga chuan, "File kal kualtir zung zung a awlsam vangin a ṭangkai hle. Hnathawh a ti awlsamin, hlawk zawkin hna a thawh theih phah. Officer credentials neite chauhin an en theih avangin a him," a ti.