Ruihhlo do chungchangah inráwnkhawm

Central YMA chuan nimin khan CYMA Hall-ah ruihhlo do chungchanga inràwnkhawmna an buatsaih a, CYMA hruaitu te, CYMA office bearer lo ni tawhte leh Central Anti Drug Squad (CADS) leh Supply Reduction Service (SRS)-a member lo ni tawhte an tel.

Inràwnkhawmna hi CYMA president R Lalngheta'n a kaihruai a, general secretary Prof. Malsawmliana'n ruihhlo donaa CYMA hmalakna tlangpui a sawi. Kalkhawmte chuan, YMA-in ruih-hlo do kumpuana a hmang chu an thlàwp tlat thu an sawi hlawm.

CYMA hruaitu hluite chuan, CYMA-in ruihhlo doa hma a lak mekna chu ṭha an tih thu sawiin, thâ thlah lo leh beidawng loa thawk zel tura an fuih rualin, fimkhur taka che turin an chah a; ṭawngṭai tam a pawimawh thu te, dikna leh rinawmna vawn reng a pawimawh thute an sawi a ni.

CYMA-in ruihhlo do tura a din mek CADS leh a din tawh ṭhin SRS member hluite pawhin thu an sawi bawk.