Kolasib-a PHE pipe phûm tur hawng

Kolasib khawpiu tana tui lakna, 'Augmentation and Extension of Distribution System of Kolasib Water Supply Scheme' hnuaia Kolasib main feeder road-a pipe phûm ṭan tur chu March 3, Thawhlehni khan PHE Kolasib WATSAN Division-a executive engineer Lalrosangi'n a hawng.

Kolasib tui lâkna hi AMRUT 2.0 hnuaia thawh niin, Rs 6,01,90,000 sênna tur a ni a; Kolasib Water Supply Scheme chu kawng hrang hrangin tichangtlun a ni dawn. Tuizem pui ber (main reservoir) aṭanga veng hrang hrang zonal tank-a tui pekna line thlak te, tui pump-na khawl thar bun te, water treatment plant-a filter media thlak te, khaw chhunga tuizêm thar siam belh te, Khuangpuilam tuizêma tui dah luhna pipe-te a thara thlak te, veng hrang hranga pipe hlui tawhte a thar lian zawka thlakte a tel.

Tui lakna tihchangtlunna turah hian Kolasib-a veng ṭhenkhatah pipe phûm ṭan a ni tawh a, Khuangpuilam aṭanga Diakkawn Square thleng booster line phûm zawh a ni tawh a, Diakkawn aṭanga Hmarveng thleng pipe milimetre 150 leh 100-a lian phûm leh tur a ni.

Pipe phúm tur hian kawngpui laih a ngaih dawn avangin mipui nunphung leh lirthei veivahna a tibuai thei dawn a; dawhthei taka nghak tur leh department hmalakna ṭawiawm turin Lalrosangi chuan mipiu a ngen.

Pipe phûm ṭanna puala hun hmanah hian pipeline-in a paltlang tur veng hrang hranga VC, Kolasib YMA Sub-Headquarters YMA hruaitute leh Kolasib MJA aiawh te, PHE department official-te an tel a ni.