NH Sairang-Thingdawl inkar kawng June 2026-ah siam zawh tum a ni - PWD Minister

PWD minister Vanlalhlana chuan MNF member pahnih K Laldawngliana leh Lalrinsanga Ralte zawhna chhangin, National Highway-306 Sairang - Kawnpui via Khamrang chu NHIDCL-in June 2026-ah siam zawh hman an tum thu nimin khan Assembly House a hrilh.

PWD Minister chuan, Sairang-Kawnpui kawng chhia siamna atan Mizoram sorkarin PWD kaltlangin kum 2025-26 ah cheng vbc 7.73 a sên thu a sawi a, "NH-306 Sairang to Thingdawl inkar kawng chu NHIDCL-te'n an siam mek a, June 2026-ah zo turin an inruahman," a ti.

Vanlalhlana chuan, Sairang-Thingdawl inkar kawng siam mek hi NHIDCL hnuai a nih avangin, tuna kawng siamna tan Mizoram sorkarin sum a sên loh thu a sawi.

MNF member Robert Romawia Royte zawhna chhangin PWD Minister chuan, PMGSY hnuaiah GST hman ṭan a nih avang leh GST rate a san tak avanga contractor-te'n GST an lo pek tawh, la rulh loh cheng vbc 127.56 a awm thu a sawi a, "Pek kim a nih theih hun tur hi tunah mai chuan sawi theih a la ni lo," a ti.