Philatelic Exhibition neih mek a ni
Sorkar laipuia Postal Department, Mizoram Division chuan nimin khan Vanapa Hall-ah Philatelic Exhibition, MIZOPEX 2026 tia vuah chu an ṭan a; khuallian Mizoram chief information commis-sioner John Neihlaia'n a hawng a, MJA general secretary K Zothanpara khualzahawm a ni.
MIZOPEX 2026-ah hian stamp la khawma zir chiangmi (philatelist) mi 16-in stamp an lak khawmte an pho lang a, mi 16 zinga 15 chu Mizoram mi niin, pakhat chu state páwn lam mi a ni. Stamp pho chhuahte hi history-a thil thleng pawimawh tak te, ram tana mi hlu leh ṭangkai tak takte chuanna stamp-te a ni a, Mizote puala stamp awm chhun, Peace Accord stamp pawh a tel.
India ram mai ni lo, ram dang thlenga Mizoram tihmingṭhatu ‘nghah loh dawr’ special cover (envelope) tlangzarh a ni a; Stamp Design Competition buat-saih a ni bawk. Exhibition hi vawiinah chhunzawma zawh a ni ang.
Inkhawmah hian khuallian leh khualzahawm ten thu an sawi. Khualzahawm K Zothanpara chuan, tunlaiah mi tam takin stamp an hre tawh lo a, an hman ṭangkai tawh loh laia stamp la khawma zir chiang ṭhin Mizo zinga mi eng emaw zat la awmte chu an hlut thu sawiin, chhunzawm zel turin a chah. MIZOPEX 2026 chu Mizoram mipuiin stamp pawimawhzia an hriat tharna a nih theih nan leh, stamp lak khawm hlimawmzia an hriat tharna ni se a duh thu a sawi bawk.