KHAWTHLIR

Chawimawina hlân

ZONET TV Pvt Ltd chuan March 4, Ningani zan khan Mizoram Civil Service (Combined Competitive) Examination 2025-a tlingte chawimawina leh fuihna hun an hmang. Inkhawmah hian Mizoram Civil Service mi 15, Mizoram Police Service pariat, Mizoram Information Service pasarih leh Mizoram Finance and Account Service pahnih hnenah chawimawina hlan a ni a; minister K Sapdanga'n fuihna thu a sawi.

Siamṭhat tum

Health & Family Welfare minister Lalrinpuii chuan nimin khan Assembly session-ah ZPM member V Malsawmtluanga zawhna chhangin, primary health centre, health & wellness centre, health sub-centre leh health clinic tlabal tawhte siamṭhat tum a nih thu a sawi.

MIOA inkhawmpui

Mizoram Industry Owners Association (MIOA) chuan nimin khan Aijal Club-ah General body Meeting cum Election an hmang a; kum 2026-2028 chhunga hruaitu tur thlangin, president atan David Lalmuanpuia leh secretary atan Vincent Vanlalngilneia te an thlang. MIOA-ah hian member 50 chuang an awm mek a ni.

Leiṭha siam zirtir

ICFRE - Bamboo and Rattan Centre chuan nimin khan Aizawla an hmunah ni hnih awh tur Green Skills Training - Introduction to Composting and Apiculture tih an buatsaih a, Bethlehem Vengthlang mi thlan chhuah 20 telin, ei bâng ningnawi leh bawlhhlawh ṭawih thei aṭanga leiṭha siam dan leh khuai khawi dan an zirtir. He hun hi Mizoram Khadi and Village Industries Board CEO JH Lalbiakliana'n a hmanpui a ni.

EMRS-ah doctor

Serchhip bawrhsap Paul L Khuma hoin nimin khan DC meeting hall-ah Eklavya Model Residential School (EMRS), Serchhipa doctor rawih dan tur sawiho a ni a; kar khatah vawih hnih zel EMRS, Serchhipa ṭhu tur part-time doctor rawih an rêl. Doctor rawih man tur chu EMRS hotute'n sorkar laipuiah an thlen dawn a ni.

Lungpui aṭangin tla hlum

March 4, Nilaini tlai khan K Zoramchhana (56) h/o C Lalbiaksangi, East Lungdar chu lungpui aṭangin a tla hlum. Thu dawn danin, K Zoramchhana hi a nupui leh a ṭhianpa nen Sailulak ram chhunga Ṭiau luiah an kal a; lungpui chunga a ding chu chesualin a tla a, a hliam tuar loin tlai dar 5:45 khan chetsualna hmunah a thi a ni.