Certificate course training khâr

Mizoram Pollution Control Board (MPCB) hnuaia Mizoram EIACP Hub-in Green Skill Development Programme (GSDP) training, Certificate Course in Waste Optimization Professional an buatsaih chu nimin khan Aijal Club-ah khâr a ni a; khârna hun hi Environment, Forest and Climate Change minister Lalthansanga'n a hmanpui.

Training hi November 24, 2025 khan hawn a ni a, nimin khan zawh a ni. Khârna hi inkhawm hi MPCB chairman Liankima Lailung-in a kaihruai a; EFCC Minister-in thu a sawi bakah, MPCB member secretary C Lalduhawma'n fuihna thu a sawi.

Minister Lalthansanga hian training chhuak mi 20 leh resource person mi 22 hnenah thuchei a hlân a; an zir chhuahte chu eizawnna atan hmang ṭangkai ngei turin a chah.

GSDP hi Skill India Mission leh Ministry of Environment, Forests & Climate Change ten state hrang hrangah an kalpui a, lehkhathiam hna nei lo, kum 18 chung lam tan course hrang hrangah training buatsaih ṭhin niin, Mizoramah chuan Mizoram EIACP Hub-i'n an kalpui a ni.