MSSC leh LADC ten inremna an ziak

Mizoram State Sports Council (MSSC) leh Lai Autonomous District Council (LADC) chuan nimin khan Sports & Youth Services minister Lalnghinglova Hmar, MSSC president ni bawk pisaah Residential School, Lawngtlai inhlan chhawnna tur inremna an ziak.

Lawngtlaia Residential School hi Pradhan Mantri Jan Vikas Karyakram (PMJVK) hnuaiah MSSC-in cheng nuai 3,461.7 sângin an sa a, Memorandum of Agreement hmangin neitu nihna leh enkawl hna LADC kutah hlan a ni.

Minister Lalnghinglova Hmar chuan, "Lai mipuite'n ṭangkai taka he Residential School hi an hman kan duh a, an hman ngei theih nan LADC kutah dah a ni. Mimal hlâkna emaw, politics khelh nan emaw a hmunhma leh bungruate hman leh lak sawn phal a ni lo," a ti a; duat taka enkawl turin LADC hotute a chah.

Inremnaah hian MSSC aiawhin secretary Henry C Lalrawnkima leh administrative officer Amy Ramchhani ten hming an ziak a; LADC aiawhin executive secretary K Lalthanzara leh Lai House, Aizawla deputy resident commissioner Lalhminghlupuii Thangen ten hming an ziak a ni.