ATL kawng siam nan nuai 7,157.47 dah a ni

PWD minister Vanlalhlana chuan Assembly session neih mekah nimin khan Aizawl - Thenzawl - Lunglei (ATL) kawng siam hna chu hmun pali-ah ṭhen a nih thu leh, kawng siam nan state sum leh SASCI aṭangin cheng nuai 7,157.47 ruahman a nih thu a tarlang.

Hachhek bialtu MLA Robert Romawia Royte zawhna chhangin PWD Minister chuan, "ATL kawng hi hmun paliah ṭhen niin, hmun khatna hi Kulikawn aṭanga Silaimual thlang thleng a ni a, hemi atan hian technical sanction leh tender buaipui mek a ni. Administrative approval leh expenditure sanction hmuh tawh a ni a, technical sanction leh tender tur buaipui mek a ni," a ti.

Vanlalhlana chuan, ATL kawng siam tur hlawm hnihna chu Mualṭhuam aṭanga Mausen inkar a nih thu sawiin, "Expenditure sanction awm tawhin, April 24, 2026 khian zawh hman tura ruahman a ni. Hmun thumna hi Mausen khua thlen hma aṭanga Pukpui inkar a ni a, tunah hian sum dah fel chiah niin, chak taka hmalak mek a ni," a ti. Hlawm lina chu Pukpui dai aṭanga Lunglawna petrol pump thleng a ni a, sum dah tawh niin, chak taka hmalak mek a nih thu a sawi bawk.