Private resolution pawm

MNF member Dr R Lalthangliana private member resolution put luh, 'Indian Air Force (IAF) in Lengpui ram an lei dan chungchangah dan bawhchhiatna nasa tak leh corruption a awm ngei nia lang hi Mizoram mipui duh dan leh beisei ang ngeiin Central Bureau of Investigation (CBI) in an chhui chhuah thuai theih nan Mizoram sorkarin rang taka bawhzuiin hma la nghal rawh se' tih chu sawiho a ni a; eptu party member-ten resolution hi a nihna anga pass an duh thu an sawi laiin, rorel lai party member-te erawh chuan resolution chu siam danglam hret an duh thu an sawi thung.

Darkar 6 dawn an sawiho hnuah resolution hi tihdanglam hret niin, lungrual taka pawm a ni a; resolution an pawm tâk chu - 'Indian Air Force (IAF) in Lengpui ram an lei dan chungchangah dan bawhchhiatna nasa tak leh corruption a awm ngei nia lang hi Mizoram mipui duh dan leh beisei ang ngeiin Central Bureau of Investigation (CBI)-in a chhui chhuah thuai theih nan Mizoram sorkarin rang taka bawhzuiin chak takin hma la rawh se' tih a ni.