Minister-in tung chi kg 4,500 a vailiam

Agriculture & Farmers Welfare minister PC Vanlalruata chuan nimin khan Agriculture & Farmers Welfare Directorate kawt aṭangin district pariata chìn tur tung chi kg 4,500 a vai liam.

PC Vanlalruata chuan, loneitute din chhuah theihna tur chu a thil vei ber a nih thu a sawi a, "Tung chìn hi Mizote rilru sukthlek nena inmil, Mizoram leilung mil bawk si a nih avangin loneitute tan thil tih chi tak a ni. Kum 1990 chhoah sorkar hmalaknain Mizoram hmun hrang hrangah nasa taka chìn lo ni tawh ṭhin mah se, a hralhna kawngah tunlai angin khawl leh inbiakpawhnate a la ṭhat tawk loh avangin a hlawhtling ta lo a ni," a ti.

India ramah tung hriak (oil) mamawhna a san zel thu leh a tam zawk chu ram dang aṭanga lak luh a nih thu te, Mizorama kut hnathawktute tan tung chìn chu tharthawh leh tlak nia a hriat thu sawiin Minister chuan, "Kum 2025 aṭang khan Agriculture department kaltlangin Saitual, Khawzawl leh Serchhip district-ahte awmze nei zawka chìn leh ṭan a ni a, kuminah phei chuan zau zawkin district pariata khaw 105-ahte chin a ni dawn," a ti a; Agriculture department-a thawktute chu kut hnathawktute tan ṭhahnem ngaia uar lehzuala zirtirnate kalpui ṭhin turin a chah.

Tung chi vailiamna inkhawm hi Agriculture secretary Ram-dinliani’n a kaihruai a; Vorya Enterprise hotu Himanshu Bansal chuan video conferencing hmangin a rawn chhim bakah thu a sawi.

Tarlan danin, tung hriak hi bungrua (furniture) tih tlêtna atan te, varnish, paints leh leather tih tlêtna atan te leh thil dang hrang hrangah an hmang nasa hle a; chìn a nih aṭanga kum thum bawr velah rah ṭan theiin, kum 30 bawr vel thleng an rah thei. Tung kung karah hian thlai dang - vaimim leh behliangte chin theih bawkin, heng vaimim leh behliangte hi central sorkar ruahman angin NAFED/NCC-ten minimum support price-in an lei thei bawk.