Vawk suat zángnadawmna cheng nuai 636 pek thuai tum

Animal Insurance kalpuina atan Mizoram sorkar chuan cheng nuai 132.98 a dawng tawh a; ASF avanga kum 2024-25 chhunga vawk suat neitute hnena zangnadawmna pek tur cheng nuai 636 pek chhuah thuai beisei a ni.

Assembly session neih mekah nimin khan AH&Vety minister C Lalsawivunga chuan, bawng, sial, vawk, kel leh beram vulhtuten an ran vulhte an thih palha pawisa an hmuh theihna tura duan, Animal Insurance kalpui nan Mizoram sorkar chuan National Livelihood Mission aṭangin pawisa first instalment leh second instalment cheng nuai 66.49 ve ve an hmuh tawh thu leh, third leh fourth instalment pawh hmuh an beisei mek thu a sawi. "Animal Insurance ti turte chuan district tina Vety office emaw, dispensary-ah emaw Vety doctor hnenah document an lak a ngai," a ti.

AH&Vety Minister tarlan danin, insurance ti turte document neih ngaite chu - proposal form, vaccination certificate, geo tagged photograph of ear tagged, soundness certificate, beneficiary Aadhaar Card/PAN Card, voter ID-te a ni. Heng zawng zawng hi neih hnuah district tina National Insurance Company staff-te hnenah kal tur a ni a; NIC staff-te biak pawhna hi Vety office-ah zawh theih reng a ni.

C Lalsawivunga chuan, ASF vanga vawk suat neitute hnenah zangnadawmna pek tur chu central sorkar leh Mizoram sorkarin an intum sem thu a sawi a, "Kum 2024-25 chhunga vawk suat neitute hnenah cheng nuai 1,559 vel kan pe tawh a, kar hmasa Zirtawpni khan central aṭangin zangnadawmna tur cheng nuai 318 kan dawng leh a, hei hi state matching share ve tur cheng nuai 318 nen pek leh thuai tura ruahman a ni," a ti. Kumin 2025-26 chhunga vawk suat neitute hnena zangnadawmna pek tur chu financial year 2026-27 annual action plan-ah telhin February, 2026 khan central-ah an thawn thlak tawh thu a sawi bawk.