KHAWTHLIR

Chhiarpui 2027

Chhiarpui 2027 (Census of India, 2027) kaihhnawihah General Administration department chuan thuchhuah siamin, April 1-15, 2026 chhungin mimal chanchin leh khawsak dan dinhmun chhiarna (self enumeration) neih a nih dawn thu leh, April 16 - May 15, 2026 chhungin in awm zat dinhmun leh a chhunga thil awmte chhinchhiahna (houselisting operations) neih a nih dawn thu a tarlang.

EMRS-ah smart classroom dah kim

Planning department hnuaia Mizoram EMRS Society enkawl Eklavya Model Residential Schools pasarih - Lunglei, Serchhip, Bilkhawthlir, Noaohtlah, Tlangnuam, Tlungvel, Zawlnuamahte HDFC Bank CSR Fund aṭanga smart classrooms dah tharte chu nimin khan Mizoram EMRS Society member secretary Vanlaldina Fanai, Planning commissioner ni bawk chuan a hawng a; tuna EMRS pasarih nen hian Mizoram EMRS 11-ah smart classroom dah kim a ni ta a ni.

NCS Portal

LESDE minister Lalnghinglova Hmar chuan Assembly Session-ah nimin khan MNF member K Laldawngliana zawhna chhangin, ṭhalai hna zawngte tan one-stop National Career Service (NCS) portal hman ṭangkai a nih thu a sawi a, "Tun dinhmunah NCS portal-ah hian active employer inziaklut mi 975 an awm tawh a, active vacancy register zah chu 156 an ni," a ti.

Tui bill cheng nuai 6,385 hmu

PHE minister Prof. Lalnilawma chuan nimin khan Assembly session-ah MNF member Robert Romawia Royte zawhna chhangin, kum 2024-2025 chhung khan sorkarin tui in tur supply pekna atan Rs 2,79,79,88,402 a sen thu a sawi a; hemi chhung vek hian tui bill aṭangin cheng nuai 6,385.302 hmuh a nih thu leh target chu cheng nuai 8,100 a nih thu a tarlang.

Lu meh leh sam tan training

Mzoram Youth Commission (MYC) chairman Malsawmzuala Ralte chuan nimin khan MYC buatsaih thla 3 awh tur lu meh leh sam tan training a hawng a; training-ah hian mipa 28 leh hmeichhia 12 telin, lu meh training hi MT CUTS, Chaltlangah leh sam tan training hi Nuseni Beauty Parlor, Mission vengah neih a ni ang.