Sipai hnena Sairang ram hralh tura hmalak tawhna sawifiah; Dan anga a hmawr bàwksak chiah hi hmabak ni tain a lang - CM

Chief minister Lalduhoma chuan nimina Assembly session-ah Sairang VC huam chhung mi 52 ram, sipai hnena leitir tura sorkar kaltate hmalak tawhna sawifiahna, 'Statement regarding acquisition at Sairang VC area by Infantry Brigade KLP (Key Location Plan)' a nei a; "Dan anga a hmawr bàwk sak chiah hi hmabak ni tain a lang," a ti.

Assembly speaker Lalbiakzama chuan dan ang thlapa statement siam dilna chu a luh avangin phalsak a nih thu sawiin, minister statement angah hian zawhna siam leh sawiho a nih ngai loh thu leh mipui tana pawimawh (public importance) a nih avangin statement chu siam a nih thu a sawi.

CM Lalduhoma chuan, tunlai hian Lengpui rama Indian Air Force-ten ram an lei chungchangah politics-a inpuhna boruak a awm mek laiin Sairang VC huam chhungah hetiang deuh tho hi a awm thu a sawi a, "Sairang VC huamchhunga Chawilung an tih, Kolabari an ti bawk a, chumi rama mimal engemaw zat ram chu Infantry Brigade KLP atan acquire tumna a awm tih tun hnaiah hriat a lo ni leh taa, hei hian politics-a inbeihnate a thlen nawn tawh loh nan leh dan hnuaiah dik taka kalpui a nih theih nan member-te leh Mizoram mipuiten thudik tak an hriat theih nan statement ka rawn siam a ni," a ti a; sorkar hmasain kut a lo thlak tawhnaah hian thil fel lote a awm a nih loh chuan chhunzawm loh theih loh a nih dawn thu leh dan anga a hmawr bawk sak chiah chu an hmabak nia a lan thu a sawi.

Kum 12 kalta, July 11, 2014 khan Aizawl DC chuan Administrative Commandant Station Heqadquarters, Aizawl hnenah lehkha number F14011/212/2011DCA27 chu thawnin, Chawilunga ram chu Infantry Brigade hnenah Mizoram sorkar pawmpuinain no objection certificate (NoC) a pek thu Chief Minister chuan a sawi a, "Mizoram sorkarin a pawmpuinaa NoC an pek hun hi kum 2014 daih tawh kha a ni a, Ministry of Defence aṭanga phalna lak a nih hnuah dan angin land aquisition chu bawhzui ni se, a ti," a ti a, Mizoram sorkarin he NoC a pekah hian ram zau zawng chu acre 570 a nih thu leh politics, dan leh sakhuana aṭanga thlir pawhin he ram hian buaina engmah a neih loh thu pawh tarlan a nih thu a sawi.

Lalduhoma chuan, "August 6, 2014-ah Pu RC Zoliana, Sairang Dinthar VCP leh Pu Lalrinngheta VC secretary-te chuan ram neitu mi 52-ten an remtihna willingness certificate chu ram neitute signature nen an thehlut a, chu chu Aizawl SDC-in phek tinah a authenticate vek bawk. Hemi rual hian ram sketch map pawh thil tel a ni. November 18, 2014-ah Aizawl DC-in Administrative Commandant hnenah bawk billed-ability certificate a thehlut a, Vide no. F14011/212/2011DCA45 niin, he certificate hi PWD Executive Engineer (building division)-in a certify a ni," a ti.

Kum 2014 - 2021 inkarah he ram lakna atan thil ṭul tam tak chinfel a nih tawh thu sawiin Chief Minister chuan, "Sorkar hmasain kut a lo thlak tawhnaah hian thil fel lote a lo awm a nih loh chuan keini tan pawh chhunzawm loh theih loh a ni dawn a, dan ang thlapa kalpui a nih theih nan notification chhuah te, SIA exemption pek chi a nih leh nih loh te, ram chu a pulunga hralh (outrightpurchase) ni loa a hawha hawh (lease) tura duan fel te, chuhbuaitu dang an awm leh awm loh enfiahte chu kan hmabak tur niin a lang," a ti a; dan anga a hmawr bawk chu an hmabak a nih dawn thu a sawi bawk.