BCM-in chak zawka corruption do an rêl

Baptist Church of Mizoram (BCM) rorelna sang ber, BCM Assembly chu March 4, 2026 khan Lunglei Bazar Veng biak-inah neih a ni a, nizan khan a ṭiak. Inkhawmpui hian hlemhletna (corruption) donaah chak zawka hmalak an rel bakah, BCM pum huapin ram tan awmni khama ṭawngṭai ni hman an rel.

BCM Assembly vawi 130-na hi March 4 zan khan ṭan niin, president Rev. Dr C Vanlaldika'n a kaihruai a, Assembly a hawng. March 5-7 chhung khan chhun lamah rorel a ni a, rorel hi President-in a kaihruai a ni.

BCM Assembly hian hlemhletna (corruption) dona kawngah chak zawka hmalak leh BCM pum huapin ram tana awmni khama ṭawngṭai an rel a; kohhran rawngbawltu politics-a inhmangte laka BCM-in beiseina a neih dan chungchang sawiho a ni a, Administrative-in lo ennawn se, Assembly Executive Committee-ah thlen leh ni se, tiin an dah.

Ruihhlo do chungchanga BCM hmalak mekna chu kum 2026-27 ah pawh chhunzawm an rel a; ruihhlo nghei tum centre aṭanga chhuakte'n enkawlna ṭha an dawn theih nan halfway home din an rêl nghal.

Mizoram Baptist kohhran ṭawngṭai hruaina bu-ah 'Krista tana tuartute tan' tih leh 'Ruihhlo ngaite leh a zuartute tan' tih dah belh rawtna an pawm a; inneih hautak lo zawnga buatsaih tih chu kohran dana inneihna chu mi tinin an tlin theih nan a hautak lo zawnga buatsaih an rêl bawk.

Kum 2026-27 budget atan cheng nuai 14,364.95 an pawm a; budget hi kohhran thawhlawm aṭangin nuai 9,688.85 leh department hrang hrang aṭangin nuai 4,676.10 hmuh beisei a ni.

BCM Assembly-ah hian thupui chu 'Dâk ula lote en rawh u' tih a ni. Nimin Pathianni khan chawhma inkhawmah BCM president thar Rev. Prof. R Zolawma'n pastor tharte a nemnghet a; chawhnuah Lalpa Zanriah Sacrament kilho a ni a, Rev. Lalremsiama Ralte-in a buatsaih.