KHAWTHLIR

Buhfai lei nan nuai 46,613.78

Assembly session neih mekah Food Civil Supplies & Consumer Affairs minister B Lalchhanzova chuan INC member C Ngunlianchunga zawhna ziaka chhangin, Mizoram sorkar chuan kum 2022-2025 chhungin buhfai lei nan cheng nuai 46,613.78 a sen ral thu a tarlang. Supply Minister tarlan danin, kum 2022-23 khan buhfai lei nan cheng nuai 10,759.75 sen a ni a, kum 2023-24 khan cheng nuai 17,558.58 leh kum 2024-25 khan cheng nuai 18,295.45 sèn a ni bawk.

Ṭanpuina sem rêl

Mamit District Monitoring Committee for Bána Kaih Scheme chu additional DC Carolyn LB Khiangte kaihhruaiin tun hnai khan an ṭhukhawm. Department hrang hranga progress partner atana thlante hnenah March 12, 2026 khian Chief Minister's Special Package Phase-II sem an ni se, an ti a; March 16, 2026-ah Handholding chungchang inzirtirna buatsaih an rel bawk.

Mibo thiin hmu

JH Siama (86), Thingdawl Hmarveng chu chin hriat loa a awm hnuah March 7, Inrinni chawhma dar 11:45 khan thiin hmuh a ni. Thu dawn danin, JH Siama hi March 6, tlai lam aṭangin a awmna chin hriat a ni lo a, khawtlangin an zawn hnuah an khaw chuanhnuai lamah thiin hmuh a ni a; feet 15 vela sang khâmah a tla nia rin a ni.

PZP Rising Day

Pang Zirlai Pawl (PZP) chuan March 7, Inrinni khan Vaṭhuampui YMA Hall-ah Rising Day vawi 42-na an hmang a, Lawngtlai district bawrhsap Donny Lalruatsanga'n a hmanpui. Bawrhsap chuan, zirlai pawl tan politics-a inhnamhnawih a inhmeh loh thu sawiin, zirlai pawl an nih ang tak leh a din chhan ang taka zirna lam hmasawnna dah pawimawh ber turin a chah. PZP president Albin Lalhruaitluanga'n kum 2026-27 PZP kumpuan 'Zirna tihhmasawn' a hawng nghal a ni.