Ruihhlo do kawngah kan zavaia kan ṭan tlan a ngai - Vanlalhlana

December 7, Inrinni khan Durtlang North Multipurpose Indoor Hall sak thar chu bialtu MLA Vanlalhlana, minister-in a hawng a, ruihhlo donaah ṭan tlan a ngaih thu a sawi.

Vanlalhlana chuan, Mizo ṭhalai tam tak ruihhlo bâwihah an tàn thu sawiin, "Ruihhlo bâwiha táng ṭhalaite hian anmahni chauh ni lo, an chhung te, an veng, an khua leh ram pum tan harsatna an siam. Chuvang chuan ruihhlo do kawngah kan zavaia kan ṭan tlan a ngai hle. Infiamna lama Mizo ṭhalai tam zawk kan kaltir theih chuan ruihhlo bâwiha an tàn hma hian kawng ṭha zawk an zawh theih ka beisei," a ti.

A bial chhungah multipurpose indoor hall an neih theihna tura Sports Minister leh department-a thawktute hmalakna fakawm a tih thu sawiin Vanlalhlana chuan, "Ṭhalaite tan sorkar inpekna leh talent nei ṭhate chher chhuah a tumna a lantir. Hall hi Mizo ṭhalaite international leh national level inelna a tel phak khawpa chhertu a nih theih ka beisei," a ti a, hall panna kawng siam a nih dawn thu a sawi.

Khualzahawm SYS minister Lalnghinglova Hmar chuan, hall hmangtu mipuite'n neitu rilru pua fai taka an vawn a, tha taka an enkawl a beisei thu sawiin, "Multipurpose tih hming pu zoa he hall hi infiamna chi hrang hrang atan hman a nih ngei se ka duh. National leh international level-a medal dawng pha infiammi chher chhuaktu a nih ka beisei," a ti a; Mizoram pum dâpa ṭhalaite theihna hai chhuahna tura sorkar hmalakna Empowering Mizoram Sports hmang ṭangkai turin kal khawmte a chah.

MLA Jeje Lalpekhlua pawhin thu sawiin, inkhel mite tan hmunhma ṭha siam bakah, naupan lai aṭanga zirtir ṭhat a pawimawh thu a sawi a, "Sorkarin infiamna lama hmasawnna ruhrel (infrastructure) mipui tam thei ang berin an chhawr theihna tur hmuna an siam zel hi a lawmawm," a ti.

Mizoram State Sports Council (MSSC) secretary Henry C Lalrawnkima sawi danin, Durtlang North Multipurpose Indoor Hall hi Ministry of Youth Affairs & Sports hnuaia Khelo India Scheme hmanga sak a ni a, cheng nuai 450 sen a ni.

November 21, 2023 khan administrative approval hmuh a ni a, Lushai Engineers-in March 18, 2024-ah kut thlak ṭanin, February 23, 2026-ah an sa zo. A dung metre 46 leh a vâng metre 20 a ni a, a sir tawn tawnah mi 200 vel thut theihna tur gallery a awm.