Women's Day-ah bai insuah tawn

Nimin kha International Women's Day vawi 115-na a ni a, Mizoram hmun hrang hrangah hman a ni. Day thupui 'Give to gain' (Pekin lukhâwng a nei) tih a ni angin, nimin khan chhungkaw eng emaw zatin bai an insuah tawn.

Womens Day pual hian thupui milin mahni phâk tawk ṭheuhah khawsak harsa zawkte ṭanpui tur leh, ṭhenawmte bai suah turin inchah a ni a; nimin khan chhungkaw eng emaw zat chuan an ṭhenawmte nen bai an insuah tawn a ni.

Mizorama thlan tlin hmeichhe pawl, All Mizoram Elected Women Representatives chuan Women's Day pualin March 7, Inrinni khan Synod Hospital an tlawh a, damlote hnenah chawchhun (lunch pack) an sem. Hemi puala inkhawm tawi buatsaih chu AMEWR chairperson R Zomuanpuii'n a kaoihruai a, AMC corporator C Lalchhandami leh Synod Hospital director Dr RL Sanghluna ten thu an sawi.

Mizoram Gorkha Women Association branch hrang hrangte chuan Women's Day pualin hmun hrang hrangah thilpek an hlan a; kohhran ṭhenkhatte'n hun an hmang bawk.

Social Welfare Women and Child Development minister Lalrinpuii kaihhruaia International Womens Day Committee ṭhukhawm chuan kumina Women's Day hi Pathianni-ah a tlak avangin March 18, 2026-ah hun hman an rêl a; Dawrpui Multipurpose hall-ah hman a ni ang.