Swap and Save kalpui ṭan a ni

Swachh Bharat Mission (Urban) chuan Aizawl leh district khawpui hrang hrangah sikul uniform leh zirlaibu hlui dah khawmna leh lak theihna, Swap and Save an buatsaih ṭan a, nimin khan Urban Development and Poverty Alleviation (UDPA) secretary Lalmalsawma Pachuau-in a hawng.

Swap & Save hi March 9-21, 2026 chhungin Aizawl leh district headquar-ters-ahte kalpui a ni dawn a; Aizawlah chuan centre pariat siam a ni a, district khawpuiah erawh centre siam zat tur bituk a ni lo a, an remchan angin siam a ni ang.

Swap and Save centre-te chu NULM hnuaia self help group member-te'n an vil dawn a, an veng chhungah sikul naupangte uniform, zirlaibu leh bungraw dangte an khawn khawm dawn. Zirlaibu leh uniform hluihlawn tawhte thawh theih a ni a, chungte chu a mamawhte'n an lo chang ve leh thei dawn a ni.

Swap and Save hawnna inkhawm hi UDPA Sanitation Site Office, Aizawlah buatsaih a ni a, UDPA director Jacob Lalawmpuia'n a kaihruai. UDPA secretary Lalmalsawma Pachuau chuan, Swap & Save an buatsaih chu mi tam takin an chhawr ṭangkai a beisei thu a sawi.

Lalmalsawma Pachuau chuan, Swap & Save chu UDPA hminga 'poverty alleviation' lai tak a nih thu sawiin, "Retheihna ûm bona remchang tak a ni dawn a, mi rethei zawkte'n an chhawr ṭangkai ka beisei. A Kristian a, a Pathian thu hle; thil ṭha ti tura siam kan nih angin thil ṭha tihna remchang a ni," a ti.

UDPA joint director C Lalduhzuali tarlan danin, UDPA department hian nikum March 19-28 chhung khan Aizawl leh khawpui dangahte Reduce, Reuse and Recycle (RRR) an lo buatsaih tawh a, a hlawhtling hle. Mi ṭhahnem takin sikul uniform, zirlaibu leh bungraw hlui chi hrang hrang 2,0386 an thehlut a, chu'ng zinga 12,596 chu a mamawhte'n an la chhuak leh a ni.

SWAP & SAVE CENTRE - AIZAWL

1. Sanitation Site Office, Tuikual South

2. Govt Multi-utility Centre, Thakthing Veng

3. AMC Plaza, Bawngkawn

4. Durtlang North LC House

5. ITI Veng LC House

6. Vaivakawn LC House

7. Armed Veng South community hall

8. Dawrpui Middle School