KHAWTHLIR

Resolution pawm

Education minister Dr Vanlalthlana official resolution, 'Eighth Schedule to the Constitution of India-ah Mizo ṭawng hi telh tura hma lak ni rawh se' tih chu nimin khan Assembly session-ah pharh a ni a; sawiho a nih hnuah pawm a ni.

Police TA/DA nuai 48.82 la bâ

Home minister K Sapdanga chuan nimin khan Assembly session-ah ZPM MLA Lalmuanpuia Punte zawhna chhangin, Mizoram sorkarin kum 2022-2025 chhunga police-te TA/DA a bat cheng nuai 1,509 chu theihtawp chhuaha an rulh thu a sawi a, "Tunah hian nuai 48.82 chiah kan ba tawh a, rang taka rulh zawh theih kan inbeisei," a ti.

Mizo thuam inbel turin hriattir

General Administration department chuan thuchhuah siamin, March 13, 2026-a Chapchar Kût hman tur pualin Mizoram sorkar hnuaia thawkte leh sorkar hnuaia public sector undertaking, board, body leh agency-a thawkte chu March 9-12, 2026 chhung pisa kainaah Mizo thuam inbel turin a hriattir.

In sa zo tawh

Commerce & Industries minister F Rodingliana chuan nimin khan ZPM member Lalchhuanthanga zawhna chhangin, Kulikawn Ngaizela Commerce & Industries building sak zawh a nih tawh thu a sawi a, "Hawn hun tur hi a la hriat mai loh a, kumin 2026 chhung chuan hawn hman tum a ni," a ti.

ZADS ṭanpui

Aizawl North-I bialtu MLA Vanlalhlana leh Aizawl East-I bialtu MLA Lalthansanga te chuan Central YMA hnuaia Zone Anti Drug Squad Zone-II ten a ṭula an hman atan nimin khan Rs 5,000 ve ve an hlan. ZADS Zone-II hian Durtlang Leitan aṭanga Sihphir, Nausel, Muthi te a huam a ni.