VUC-in hmasawnna a awmah an ngai

ZPM Val Upa Council (VUC) chuan nimin khan thuchhuah siamin, mipui ni tin mamawh hrang hrang te, sorkar pisa inrêlbàwlna leh eirûkna leh hlemhlêtna donaah hmasawnna nasa tak a awm nia an hriat thu an larlang.

VUC chuan, March 7, 2026 khan an ṭhukhawm a, kum hnih chhunga ZPM sorkar hnathawhte an thlirho tih sawiin, "Tui, electric, gas, kawngpui, ration buhfai, sorkar office inrelbawlna, corruption do thu-ah leh thil dang tam taka hnathawhah a ṭha zawnga hmasawnna nasa tak a awm niin kan hria. Duhthusam ang pha vek lo mah se, kan hruaitute inpekna thûk tak avang leh Mizoramah rorelna ṭha tun din tuma tih tak zeta an thawh avangin lawmawm kan ti hle," an ti a; chak tak leh huai taka hma la zel turin sorkar hotute duhsakna an hlan.

ZPM a pian aṭanga rei lo têah ZPM sorkar uaptu, khalh ngiltu, zilhhautu leh thuràwn petu atan VUC din a ni tih sawiin VUC chuan, "ZPM sorkar siam a nih hmaa party a nih lai pawhin theihtawp chhuahin party khalh ngil hna thawkin, zilhhau ngaite a zilhhau ṭhin. A tìr aṭanga vawiin thlengin thla khat danah emaw vawi khat tal meeting neih a ni ṭhin a, sorkar hnathawh kal lai mekah enpui ngai leh thurawn pek ngaite a awm a nih chuan a ṭul angin hma a la vat ṭhin," an ti.