Aizawlah Chapchar Kût Tlân buatsaih

Central YMA leh Art & Culture department chuan nimin zing khan Aizawlah Chapchar Kût Tlân an buatsaih a, minister Lalthansanga'n a hmanpui.

Chapchar Kût Tlân hi hmun hnih aṭangin huaihawt a ni a; Sikulpuikawn aṭanga tlante chu CYMA finance secretary MS Ralte-in a vailiam a, Chanmari kâwn aṭanga tlante chu CYMA assistant secretary David Ngursangzuala'n a vailiam. Tlâna telte hi Lammualah an lut khawm a ni.

Minister Lalthansanga chuan, Chapchar Kût chu Zo nun ze mawi chhawm nunna leh inpumkhatna atan hman ṭhin a nih thu a sawi a; "Chapchar Kût thupui 'Zo nun ze mawi – Inremna’ hi aia upa zahna leh inpumkhatnate nen a inrem hle a ni," a ti a; Mizo hnam ze ropui tak takte chawi sang zel turin kal khawmte a chah.