Chapchar Kût Flower Show ṭan a ni

Horticulture minister C Lalsawivunga chuan nimin khan Aijal Club Park-ah Chapchar Kût puala buatsaih ‘Chapchar Kût Flower Show’ a hawng a; kumin Chapchar Kût thupui ‘Inremna’ tih a nih angin Mizoram mipuite inrem taka awm turin a chah.

C Lalsawivunga chuan, chi bil leh politics vanga inlak hran duhna awm ṭhinte bo se a duh thu sawiin, inrem taka awm turin Mizoram mipui a chah a, "Chapchar Kûtah hian state pawn aṭangin khualzin an lo kal dawn a, mikhual thleng thiam nih a ṭha hle. Tute pawhin min la rawn tlawh ang, min rawn tlawhtute lo dawngsawng thiam kan nih a pawimawh a, theihtawp chhuaha kan lo dawnsawn a ṭha," a ti.

Chapchar Kût Flower Show hi Horticulture department, Mizoram Florists' Association, Zo-Anthurium Growers Cooperative Society, Bonsai Association of Mizoram leh Orchid Society of Mizoram te buatsaih a ni a; March 12, 2026 thleng Aijal Club Park-ah hian chhunzawm tur niin, pangpar leh a kaihhnawih zawrhna stall 47 siam a ni.

UDPA department aṭanga ngenna an dawn angin Flower Show chhung hian hman khat daih sarâng (single use plastic) hmang tlem tura inzirtirna uar taka kalpui tum a ni bawk.