Sikul zirlaibu a rawn thleng tawh; 'NG' sawn tum leh tum loh hre lo

School Education minister Dr Vanlal-thlana chuan, sikul zirlaibu ṭhenkhat a rawn thlen tawh thu nimina Assembly session-ah a sawi a; Mizo hawrawpa 'NG' awmna sawn tum a nih leh nih loh sorkarin a hriat loh thu a sawi bawk.

ZPM member Lalmuanpuia Punte zawhna chhangin Education Minister chuan, sikul zirlaibuah an ṭan thu a sawi a, "Zirlaibu 57 print-tir a ni a, chung zinga 29 chu a lo thleng tawh. A ṭhen kalkawngah a thang mek a, print mekte pawh a awm," a ti.

Dr Vanlalthlana chuan, sikul ṭan hmain zirlaite'n zirlaibu an neih kim theih nan an nawr mek tih sawiin, "A tam zawk chu kan inpek hman ngei kan beisei," a ti a, theihtawp an chhuah thu a sawi.

MNF member K Laldawngliana zawhna chhangin Education Minister chuan, "NG sawn tumna a awm sawrkar ang chuan kan hre lo," a ti. Mizo ṭawng chungchang chu Mizo Language Development Board-in an buaipui a, A AW B chungchang pawh an zir chian mek thu sawiin, "MLDB Chairman-in NG awmna sawn tum a nih thu a sawi kha kei pawhin ka vawi khat hriatna a ni," a ti.