CYMA aiawhte'n kawng siam an endik; Hmasawn dan a ṭha thawkhatah an ngai

Central YMA hnuaia Road Monitoring Committee chuan March 9, Thawhṭanni khan Vairengte leh Sairang inkara national highway siam mek an endik a; kawng siamtute hmasawn dan chu a ṭha thawkhata an ngaih rualin, J Infratech Limited chu an ṭan lehzual a ngaia an hriat avangin hun tiama zo hman ngei turin an hrilh.

CYMA Road Monitoring Committee member-te hian Sairang Zero Point aṭanga Buichali lei inkar te, New Khamrang leh Kawnpui inkar leh, Kolasib leh Bilkhawthlir inkar kawng siamtu J Infratech chu, tuna an dinhmun enin, hna an zawh hun tura an intiam April 30, 2026-ah an zawh hman loh an hlauh thu an hrilh a; hna chhiat phah si loa a chak thei ang bera thawk tur leh, hna thawktu a tam thei ang ber lak belh turin an chah a ni.

Kolasib leh Rengte-kawn inkar kawng siamah alkatra (bitumen concrete mix) kawngpuia an chap darh tawh, roadroller-in a la chîl muk lohah, a sat zawng (temperature) chu pawm theih chin aia a hniam tawh avangin paih turin Road Monitoring Committee chuan an hrilh a; CYMA hruaitute awm laiin JCB hmanga hai khawkin an paih nghal.

Buichali lei leh New Khamrang inkara kawng siamtu BRC company chuan March 2026 chhungin thawh zawh hman an tum thu CYMA hruaitute an lo hrilh a; YMA hruaitute pawhin, hnathawh dan enin, March thla chhunga an zawh hman an rin thu leh lawmawm an tih thu an sawi.

Road Monitoring Committee hruaitute chuan, Vairengte-Bil-khawthlir leh Kolasib-Kawnpui siamtu Balaji Constructions-in hna an thawk zo thawkhat tawh tih sawiin, lawmawm an tih thu an hrilh.

Kawng siamtute hian harsatna an tawhte leh puih an ngaihnate CYMA hruaitute an lo hrilh. Kawng siam endiktu an tam lutuk a, endiktu hrang hrang an kal apiangin contractor (company)-a hotu lu berte'n ṭawiawm zel a ngaih ṭhin avangin, an hnain a khawmuan phah thu an sawi.

Road Monitoring Committee hruaitute chuan, kawng endiktu dangte pawhin an remchân huna kal tawp lo deuhin, a theih chuan NHIDCL leh contractor-te remchan hun zawt hmasain endik thei se an duhpui thu an sawi a; endiktute'n hna thawh hmasak turah duh dan hrang an neih ṭhin avangin, kawng siamtute ruahmanna siam an hriatthiampui a ṭul thu an sawi bawk.

Kawng siam endiknaah hian CYMA Road Monitoring Committee secretary K Lalrimawia leh RS Lalrinsanga te an kal a; Kolasib Sub-Headquarters YMA-a Road Monitoring Committee hruaitute an tel bawk. NHIDCL Project Manager leh contractor hotute'n an lo dawngsawng a ni.