CAA duh lohna lantirtu an pung zel Delhi police-te chêt danin dem a hlawh

Citizenship Amendment Act (CAA), 2019 dodalna chu India ram chhung hmun hrang hrangah a darh zau zel a; hmarchhak state hrang hrangah lungawi lohna lantir a nih hnuah, khawpui dangah pawh duh lohna lantir zui ve leh mek a ni.

India ram khawpui ber Delhi-ah chuan Jamia Millia Islamia University zirlaite'n December 13, 2019 tlai aṭang khan CAA duh lohna an lantir ṭan a, Pathianni khan nawrh an huaihawtnaah police-te nen innawrin, buaina nasa tak a chhuak zui.

Police-te chuan nawrh huaihawtte hnawh darh nan mittui tlakna hlo (tear gas) leh tiang an hmang a, JMI University campus luhchilhin, zirlai eng emaw zat an hréng a, kut an thlak bawka sawi a ni. Zirlai hrente chu nimin zing khan chhuah an ni. Zirlaite nawrh huaihawtnaah hian bus pali leh two wheeler pahnih hâl a ni bawk.

JMI University vice chancellor Najma Akhtar chuan, university campus chhunga zirlaite chunga police-te chêt danah an lawm lo hle tih sawiin, Delhi police-te lakah FIR an thehlut dawn tih a sawi a, "Police-te chu phalna nei loin campus-ah an lut a, râwng takin zirlaite chungah an che zui a ni," a ti.

Hetih lai hian, Delhi police-te chuan thil hâl, buaina chawk chhuak leh public property tihchhiat chungchangah zirlaite lakah FIR pahnih an ziak lut tawh. JMI University zirlai leh police-te inkara buaina chhuak avangin nimin khan Delhi chhimchhak lam biala sorkar sikul leh mimal sikulte chu khâr vek a ni.

Delhi University zirlaite pawhin nimin khan exam an boycott a, tlaiah India Gate-ah an pungkhawm. Nimin vêk khan zirlai tam takin JMI University zirlaite chunga police chêt dan demna lantirin, JMI University kawtah an pungkhawm bawk a, zirlai bakah, tualchhung mi nu leh pate pawh an tel.

Pungkhawmte chuan, Delhi police-te chêt dan chu Central Bureau of Investigation (CBI) chhuitir an phût thu sawiin, BJP kaihhruai National Democratic Alliance (NDA) leh Delhi police-te an demna thute an aupui a; inthliarhranna kalpui tumtu sorkar lakah an ngawi mai mai dawn lo tih an puang.

Uttar Pradesh-a Aligarh Muslim University (AMU) zirlaite pawhin CAA duh lohna lantirin tharum thawhna a thleng a, hei vang hian January 5, 2020 thleng university khâr a nih thu, AMU registrar Abdul Hamid chuan a puang. AMU-a zirlai leh police-te innawr buainaah zirlai 60 vel an hliam tih official-te chuan an sawi.

AMU Registrar chuan, police-te chuan Pathianni zan tlai tawh takah university campus an luhchilh a, zirlaite chu an hostel chhuahsan turin an ti niin a tarlang. AMU-a buaina a chhuah hnuah Uttar Pradesh sorkar chuan an state khawthlang lam bialah internet service a titawp nghal a ni.

Nimin khan Lucknow-a Nadwa College-ah CAA duh lohna lantirtu zirlaite leh police-te an innawr buai bawk a, zirlaite chuan police-te chu lungin an tâwng a ni. Lucknow SP Kalanidhi Naithani chuan, buaina chu thunun theih a nih thu leh zirlaite pawhin an zirlai an chhunzawm leh nghal theih thu a sawi.

Delhi-a Jawaharlal Nehru University, Uttar Pradesh-a Banaras Hindu University, West Bengal-a Jadavpur University, Indian Institute of Technology-Bombay, Mumbai-a Tata Institute of Social Sciences, Pondicherry University, Patna University-te bakah, college leh university dang eng emaw zatah CAA duh lohna leh an zirlaipuite chunga police chet dana lungawi lohna lantir a ni bawk.