MGNREGA hnuaiah Mizoram sorkarin cheng vbc 6,498.17 a dawng tawh

Rural Development minister Prof. Lalnilawma chuan ZPM member H Ginzalala zawhna chhangin, Mahatma Gandhi National Rural Employment Guarantee Act (MGNREGA) hnuaiah Mizoramin cheng vbc 6,498.17 a dawn tawh thu nimin khan Assembly House a hrilh.

Prof. Lalnilawma chuan, ni 100 inhlawh tia hriat MGNREGA chu Mizoramah kum 2006 aṭangin hman a nih tawh thu a sawi a, "Vawiin thlenga he scheme hnuaia central aṭanga Mizoramin pawisa a dawn tawh zat chu cheng vbc 6,498.17 a ni. MGNREGS hian Mizoram economy-ah nghawng ṭha tak a nei. He scheme hmang hian thingtlang mipuite eizawnna tihpun a ni a, an sum lak luh a tiziaawmin, khawpuia pêm an tlem phah," a ti.

MGNREGA chuan thingtlang mite tan infrastructure ṭha siam a nih thu sawiin RD Minister chuan, "Mizoram GSDP-ah hian direct percentage contribution nei lo mah se, indirect economic growth driver a ni," a ti a; thingtlang economy leh local market hmasawnnaah MGNREGA-in chanvo pawimawh tak a luah thu a sawi.

Prof. Lalnilawma chuan MGNREGA chu dan hmanga duan a nih avangin state sorkarin a duh dana a her rem leh siam danglam a rem lo tih a sawi a, "Act leh guidelines-in a phal leh a ruat chin chauh hna thawh tur a ni. Mahse, he framework chhungah hian work planning tih ṭhat lehzual, convergence work tam zawk kalpui, livelihood chawikanna lam hna tam zawk thawh hmangin a ṭha zawngin a her danglam theih," a ti.