KHAWTHLIR

PUC-in thisen pe

Pachhunga University College NSS chuan nimin khan an hmunah thisen pek rûnpui an huaihawt a, Civil Hospital, Aizawl tan thisen unit 205 an pe a, petute mipa 157 leh hmeichhia 48 an ni.

Permit pe thar lo

Transport minister Vanlalhlana chuan nimin khan Assembly session-ah MNF member K Laldawngliana zawhna chhangin, kum 2024 - 2026 chhungin Aizawlah two wheeler taxi permit pek thar an awm lo tih House a hrilh a, "Tun dinhmunah Aizawlah two wheeler taxi service 3,321 a awm," a ti.

CSS scheme siam

DPAR minister K Sapdanga chuan, centrally sponsored scheme (CSS) hnuaia hnathawkte dinhmun siamṭhat nan 'The Government of Mizoram Regularization of CSS Employees Scheme, 2024' duan a nih thu House a hrilh. Minister hian nimin khan Assembly session-ah INC member C Ngunlianchunga zawhna a chhang a ni.

Sawhthing lak luh khap

Aizawl district magistrate Lalhriatpuia chuan thupek chhuahin, Aizawl district-ah Myanmar aṭanga sawhthing lak luh khap a nih thu a puang. Magistrate chuan, "Dan phal loha ram dang aṭanga sawhthing lak luh a nih chuan Mizoram economy-in a tawrh dawn bakah, an thar chhuahte hralhna kawngah sawhthing chingtute'n nasa takin harsatna an tâwk dawn a, sorkar flagship programme Bana Kaih hlawhtlinna tur dâl theitu a ni thei," a ti.

MZU-ah seminar

Mizoram University (MZU) Department of Political Science leh Indian Council of World Affairs chuan nimin khan MZU-ah 'Border Management: Traditional and non-traditional security challenges' tih thupui zirhona an buatsaih. Ni thum awh tur international seminar hawnna hi adviser to chief minister Lalmuanpuia Punte, MLA-in a hmanpui a ni.