Kawlphethaa hmasawn dan tur sawiho; Chhimtuipui khuah tuma hmalak a ni

Power & Electricity minister F Rodingliana leh department hotute chuan March 9, Thawhṭanni khan Adani Group aiawhte nen kawlphetha megawatt 460 siam chhuak thei tura Chhimtuipui (Kolodyne) Hydel Project khuah dan tur leh Mizorama power sector tihhmasawnna atana thawhho theih dan tur an sawiho.

F Rodingliana chuan, Mizoram sorkarin kawlphetha intodelh a tumna kawngah thawhpui tur company ṭha a dap mek laia India rama company lian leh rintlak ber zinga mi Adani Group-in Mizoram lam hawia hmalak duhna an nei chu a lawm thu a sawi a, "Hydro power sector-ah Mizoram hian theihna sang tak a nei a, chu’ng hai chhuak tur chuan puihna kan mamawh a ni," a ti.

Adani Group hnuaia Business Development - Hydro Pump Storage Project vice president Sumit Verma chuan, tun hnaiah Adani Group chuan green energy development lamah nasa taka hma a lak thu sawiin, "He lama Mizoramin hai chhuah tur a neihte hai chhuahpui a, thawhhona ṭha tak kan neih chhoh zel ka beisei," a ti a; project-te a hmunah an enfiah dawn thu a sawi.

Inkawmhonaah hian Chhimtuipui (Kolodyne-II) Hydel Project ruahman mek leh Darzolui Pump Storage Project hmun turte chu Adani Group aiawhte tlawh turin an rêl a, nimin khan an pan nghal a ni.