Zirtirtu indaih lohna phuhruk turin hma la

ZPM member H Ginzalala zawhna chhangin Education minister Dr Vanlalthlana chuan nimin Assembly session-ah zirtirtu indaih lohna phuhru tura an hmalakna a sawi.

Education Minister sawi danin, zirtirtu indaih lohna phuhru tur hian Directorate of School Education chuan primary school tan post ruak hnawhkhah a dil mek a, middle school-ah chuan contract-a la turin ruahmanna siam a ni.

High school-ah chuan casual teacher 20 (science & maths) lak mek a nih bakah, regular teacher 57 lak phalna dawn a ni tawh a, hmalak mek a ni. Higher secondary school tan casual teacher 15 an la mek.

Samagra Shiksha hnuaiah zirtirtu Samagra Shiksha hnuaiah sanction post primary-ah 558, upper primary-ah 1,655, high school-ah 670 leh higher seconday-ah 398 an awm mek.

Tun dinhmunah post ruak primary-ah 22, upper primary-ah 55, high school-ah 5 leh higher secondary-ah 12 a awm mek a, a tahtawla hnawhkhah zel tum a ni.

Samagra hnuaia higher secondary ṭhenkhatte zirtirtu lak an nih laia diltu hmuh zawh a nih loh avangin sikul mamawh avangin tunah hian tutor angin mi panga tun session zawh thleng atan rawih mek an ni.