Income tax zirhona buatsaih

Income Tax department, Shillong leh Hrangbana College (HBC) Department of Commerce chuan zirlaiten income tax chungchang hriatna thûk zawk an neih theih nan March 9, Thawhṭanni khan HBC-ah 'Income Tax Awareness Programme' an buatsaih a, zirlai 132-in an chhim.

Zirhonaah hian Income Tax principal commissioner Imokaba Jamir chuan income tax chungchanga hriat tur pawimawhte a sawi a; Income Tax commissioner Lalramsanga Sailo-in Income Tax Act Section 10(26) hnuaia Mizoram leh hmarchhak state-a cheng tribal-te tana chhiah âwl (exemption) chungchang a sawifiah.

Income Tax Act 1961 Section 10(26)-in a tarlan danin, hmarchhak state - Mizoram, Meghalaya, Nagaland, Arunachal Pradesh, Tripura leh Assam hmun thenkhat leh Ladakh-a scheduled tribe-te chu income tax âwl an ni a; heng state/union territory páwn lamah erawh chuan eng aṭang pawha sum lak luh neite chu tribal ni mah se, income tax an pek ngei a ngai thung.