Aizawl leh district khawpui pali-ah CAA duh lo ṭhalaite an pungkhawm

Citizenship (Amend-ment) Act, 2019 (CAA) duh lohna lantirin nimin khan Aizawl leh district khawpui hrang hrangah Mizo ṭhalaite an pungkhawm a, CAA an duh lohzia an auchhuahpui bakah, Citizenship (Amendment) Bill (CAB) thláwptu MNF party leh Mizoram Lok Sabha MP an dem thu an puang.

CAB/CAA duh lohna lantirna atana punkhawm hi Zoram Revolutionary Movement (ZRM) tih invuahte huaihawt a ni a, CAB/CAA duh loh vanga ṭhalai intélkhawm chawp an ni. Aizawlah chuan Vanapa Hall kawtah chawhma dar 11 aṭangin an pung khawm a, CAB/CAA duh lohna thuziak chi hrang hrang an keng a ni.

Vanapa Hall kawta punkhawmnaah hian ṭhalaite chu an ṭawngṭai rual a, Supreme Court-in CAA a hnâwl theih nan an dil. CAA duh lohna thu chi hrang hranga an aurual bakah, Mizo hnam hla 'Ro min relsak ang che' tih an sa ho bawk.

Aizawla an aurualna thute chu - 'CAA - kan duh lo' tih te, 'CAA thláwptu MP - Báng rawh se' tih te, 'Mizo mipui phatsantute - Zak rawh se' tih te, 'BJP sorkar - Murdabad' tih te, 'CAA - Haihai' tih te, 'Modi sorkar - Down down' tih te, 'North East unity - Long live' tih te, 'Discrimination - Down down' tih te, 'Indigenous rights - Zindabad' tih te, 'Revolution - Zindabad' tihte a ni.

Lunglei, Champhai, Kolasib leh Serchhip khawpuiahte pawh nimin khan ṭhalaite an pungkhawm bawk a, mi eng emaw zat telin, CAA duh lohna an lantir a ni.